Sunday, April 29, 2018

കേരള വിദ്യാഭ്യാസ രംഗത്തെ മുല്ലപ്പൂ വിപ്ലവം!!

കടപ്പാട്: ഡെക്കാൻ ക്രോണിക്കിൾ
കേരളത്തിലെ ആധുനിക വിദ്യാഭ്യാസ രംഗം തമാശകൾ കൊണ്ട് നിറഞ്ഞതാണ്. സ്വകാര്യ വിദ്യാഭ്യാസ മാനേജ്മെന്റുകൾ ഒരു പൂ ചോദിക്കുമ്പോൾ ഒരു പൂക്കാലം തന്നെ കൊടുക്കുന്ന മാറി മറിഞ്ഞു വരുന്ന ഭരണകൂടങ്ങൾ. സ്വകാര്യ കോളേജുകളെ വഴി തട്ടി നടക്കാൻ മേലാത്ത അവസ്ഥയാണ് ഇന്ന്. തേങ്ങാ കച്ചവടക്കാർ, മാങ്ങാ കച്ചവടക്കാർ, വസ്തു കച്ചവടക്കാർ, എന്തിനു പള്ളി -ക്ഷേത്ര കമ്മറ്റികൾ പോലും എഞ്ചിനീയറിംഗ് കോളേജുകൾ തുടങ്ങി. കോളേജ് തുടങ്ങിയവരുടെ എല്ലാം ലക്ഷ്യം ഒന്ന് തന്നെ; പണം സുരക്ഷിതമായി നിക്ഷേപിക്കുക, വിദ്യാഭ്യാസ വിചക്ഷണന്മാരായി സമൂഹത്തിൽ അറിയപ്പെടുക (സ്കൂളിന്റെ പടി കണ്ടിട്ടില്ലാത്ത മുതലാളിമാരെ എല്ലാരും സാറേ എന്ന് വിളിക്കും, ബഹുമാനിക്കും). മദൻ മോഹൻ മാളവ്യ (ബനാറസ് ഹിന്ദു യൂണിവേഴ്സിറ്റി), സർ സയ്യദ് അഹമ്മദ് ഖാൻ (അലിഗർ യൂണിവേഴ്സിറ്റി) ഇവരൊക്കെയാണ് നമ്മൾ അറിയുന്ന വിദ്യാഭ്യാസ വിചക്ഷണർ. ഇവരാരും ലാഭേച്ഛയോട് കൂടിയല്ല ദേശീയ പ്രാധാന്യമുള്ള വിദ്യാഭ്യാസ സ്ഥാപനങ്ങൾ സ്ഥാപിച്ചത്. ആദ്യകാലങ്ങളിൽ മിടുക്കുള്ള വിദ്യാർഥികൾ എഞ്ചിനീയറിംഗ് കോളേജുകളിൽ നിന്ന് പഠിച്ചിറങ്ങി, ജോലി വാങ്ങി. കോളേജുകളുടെ ബാഹുല്യം കാരണം ക്രമേണ സീറ്റ് നിറക്കാൻ നിലവാരമില്ലാത്ത വിദ്യാർത്ഥികൾക്ക് പ്രവേശനം കൊടുക്കേണ്ടി വന്നു. എല്ലാ പേപ്പറുകളും എഴുതി ജയിക്കാൻ സാധിക്കാത്തവർ ഇപ്പോഴും ഗതി കിട്ടാ പ്രേതം പോലെ ജീവിക്കുന്നു. നിങ്ങളുടെ നാട്ടിൽ എഞ്ചിനീയറിംഗ് കോഴ്സ് കഴിഞ്ഞും യുവാക്കൾ മാതാപിതാക്കളെ ചുറ്റിപ്പറ്റി ജീവിക്കുന്നുണ്ടേൽ ഊഹിക്കാം ഇനിയും അവർക്ക് പേപ്പറുകൾ എഴുതി എടുക്കാനുണ്ടെന്നു. സ്വകാര്യ എഞ്ചിനീയറിംഗ് കോളേജുകളുടെ ലോക നിലവാരം കാരണം വിജയകരമായി പഠിച്ചിറങ്ങിയ പിള്ളാര് ഒന്നിനും കൊള്ളാത്തവരായി ജോലി കിട്ടാതെ അലയുന്നു.

എഞ്ചിനീയറിംഗ് പഠനം കഴിഞ്ഞപ്പോൾ ഉദ്യോഗാർത്ഥികൾക്കിടയിൽ പുതിയ സാമൂഹിക പ്രശ്നങ്ങൾ ഉടലെടുത്തു. ഉദാഹരണമായി, സിവിൽ എഞ്ചിനീയറിംഗ് പഠിച്ച യുവ എഞ്ചിനീയർമാർക്ക് പണി സ്ഥലത്തു ഇറങ്ങി വെയിൽ കൊള്ളാൻ വയ്യാ. പഠിക്കാൻ തുടങ്ങുന്നതിനു മുൻപ് ഇത്തരം കാര്യങ്ങളെക്കുറിച്ചു ആലോചിക്കാൻ സമയം കിട്ടിയിരുന്നില്ല. അന്തസ്സ് കാത്ത് സൂക്ഷിക്കാൻ എം. ബി. എ. കോഴ്സുകൾ, ബാങ്ക് കോച്ചിംഗ്, സിവിൽ സർവീസ് കോച്ചിംഗിന് പോകാൻ തുടങ്ങി. ആദ്യ കാലത്തു എഞ്ചിനീയറിംഗ് കോളേജുകൾ തുടങ്ങിയവർ കാശുണ്ടാക്കി. ഇന്ന് മിക്കവാറും എഞ്ചിനീയറിംഗ് കോളേജുകളും വിദ്യാർത്ഥികളെ കിട്ടാത്തതിനാൽ പൂട്ടാൻ തുടങ്ങുന്നു. ചില കോളേജുകൾ എഞ്ചിനീയറിംഗ് കോളേജ് നിർത്തിയ ശേഷം പോളിടെക്നിക്കുകൾ തുടങ്ങാൻ പോകുന്നു. പോളിടെക്നിക്ക് തുടങ്ങുന്നതാണ് പുതിയ തരംഗം. എഞ്ചിനീയറിംഗ് കോളേജുകളിൽ ചെറിയ മാറ്റം വരുത്തിയാൽ പോളിടെക്നിക്ക് തുടങ്ങാനുള്ള അനുവാദം കിട്ടും. കുറച്ചുവർഷങ്ങൾക്കു കഴിയുമ്പോൾ പോളിടെക്നിക്കുകളും കഥയാകും. അന്നൊരു പക്ഷെ ലിഫ്ട് ടെക്നോളജി, ഫയർ ഫൈറ്റിംഗ് പോലെയുള്ള കോഴ്സുകൾ ആവും തരംഗം!!

മെഡിക്കൽ വിദ്യാഭ്യാസത്തിന്റെ അവസ്ഥയും വ്യത്യസ്തമല്ല. ഒരു സ്വകാര്യ മെഡിക്കൽ കോളേജിൽ വിദ്യാർത്ഥികളെ കൂട്ട കോപ്പിയടിക്കാൻ അനുവദിച്ച കഥ പ്രസിദ്ധമാണല്ലോ. മെഡിക്കൽ പ്രവേശനത്തിന് കൊടുക്കുന്ന വമ്പൻ കോഴ മുതലാക്കിയെടുക്കാൻ യുവ ഡോക്ടർമാർ വളരെയധികം പരിശ്രമിക്കേണ്ടി വരും!!

പിന്നീട് സ്വകാര്യ B.Ed കോളേജുകളുടെ വസന്ത കാലം തുടങ്ങി. മുക്കിനും മൂലയിലും സ്വകാര്യ B.Ed കോളേജുകൾ. പഠിച്ചിറങ്ങിയവർ ഭൂരിഭാഗം ആൾക്കാരും ചുമ്മാതെ വീട്ടിലിരിക്കുന്നു. കുറേപ്പേർ സ്വകാര്യ സ്കൂളുകൾക്ക് വേണ്ടി അടിമപ്പണി ചെയ്യുന്നു. മാന്യമായ ശമ്പളം കിട്ടാത്തതിന്റെ കലിപ്പ് സ്വകാര്യ സ്കൂളിലെ അധ്യാപകർ പഠിപ്പിച്ചു തീർക്കും. അവിടെ പഠിക്കുന്ന പിള്ളേരുടെ കാര്യം കട്ടപ്പൊക!!

എഞ്ചിനീയറിംഗ് കോഴ്സുൾക്ക് ഇനി വിട്ടാൽ പിള്ളാര് ഗതിപിടിക്കില്ല എന്ന് മനസ്സിലാക്കിയ മാതാപിതാക്കൾ പിള്ളേരെ ആർട്സ്&സയൻസ് കോളേജുകളിലേക്കു വിട്ടു തുടങ്ങി. എഞ്ചിനീയറിംഗ് തരംഗം കാരണം ചൊറി കുത്തിയിരുന്ന എയ്ഡഡ് കോളേജ് വിപണി ഉഷാറായി തുടങ്ങി. മാനേജ്മന്റ് സീറ്റുകൾക്ക് കോഴ ലക്ഷങ്ങളായി ഉയർന്നു. ആർക്കും വേണ്ടാതെ കിടന്നിരുന്ന എക്കണോമിക്സ്, ഇംഗ്ലീഷ്, ഹിസ്റ്ററി തുടങ്ങിയ കോഴ്സുകൾക്ക് വല്യ ഡിമാൻഡ് ആയി. പിള്ളാരുടെ തള്ളു കുറയുന്നില്ലാന്നു കണ്ടിട്ട് എയ്ഡഡ് കോളേജുകളിൽ സെൽഫ് ഫിനാൻസിങ് കോഴ്സുകൾ തുടങ്ങി. പണം കുമിഞ്ഞു കൂട്ടുന്നത് കണ്ട് മാനേജ്മെന്റുകൾക്ക് സന്തോഷം കൊണ്ട് തുള്ളിച്ചാടി. ഇനി വരുന്ന പത്തു കൊല്ലം എന്നത് ആർട്സ്&സയൻസ് കോഴ്സുകളുടെ ആണ് എന്ന് മുതലാളികൾ മണത്തറിഞ്ഞു. അവരും തുടങ്ങി സെൽഫ് ഫിനാൻസ് മേഖലയിൽ ആർട്സ്&സയൻസ് കോളേജുകൾ. യൂണിവേഴ്സിറ്റികളെ ചാക്കിട്ട് പുതിയ സ്വകാര്യ കോളേജുകൾക്കുള്ള അനുവാദം വാങ്ങി. എയ്ഡഡ് കോളേജുകളിൽ പഠിക്കാൻ പോകുന്ന പിള്ളാര് വരെ ഇപ്പോൾ യൂണിഫോം ഒക്കെ ഇട്ടു പഠിക്കാൻ പോകുന്നു.

അടുത്ത ഊഴം ലോ കോളേജുകൾക്കായിരിന്നു. സ്വകാര്യ ലോ കോളേജുകൾ തുടങ്ങാനുള്ള അനുമതി കുറച്ചു സമുദായങ്ങൾക്കും കോർപ്പറേറ്റ് മാനേജ്മെന്റ്കൾക്കും കൊടുത്തു. പ്ലസ്ടു കഴിഞ്ഞവർക്കുള്ള അഞ്ചു വർഷ കോഴ്സുകൾ തുടങ്ങിക്കഴിഞ്ഞു. വക്കീൽ ഭാഗം പഠിച്ചിറങ്ങിയവർക്ക് അരി വാങ്ങാനുള്ള കാശ് പോലും ഒരു ദിവസം കിട്ടുന്നില്ല. വക്കീലന്മാരിൽ കുറച്ചു ശതമാനത്തിനു മാത്രമാണ് മാന്യമായ  വരുമാനം ഉള്ളത്. സ്വകാര്യ ലോ കോളേജുകളിൽ നിന്ന് പിള്ളാര് പഠിച്ചിറങ്ങുമ്പഴേക്കും വക്കീലന്മാരുടെ കാര്യത്തിലും ഒരു തീരുമാനം ആകും.

ഭസ്മാസുരന് വരം കിട്ടിയ അവസ്ഥയിലാണ് കേരളത്തിലെ സ്വകാര്യ കോളേജ് മാനേജ്മെന്റുകൾ. സർക്കാരിനെ പോലും വെല്ലുവിളിച്ചു കൊണ്ടാണ് അവരുടെ പോക്ക്. സർക്കാരിന് പോലും ഇന്ന് സ്വകാര്യ കോളേജുകളെ ചോദ്യം ചെയ്യാൻ ആവാത്ത അവസ്ഥ. വിദ്യാഭ്യാസം എന്നത് പണം ഉള്ളവർക്ക് മാത്രമുള്ള അവകാശം എന്ന രീതിയിൽ മാറിക്കഴിഞ്ഞു. വിദ്യാഭ്യാസത്തിൽ മുതൽ മുടക്കുന്നതിൽ നിന്നും കേന്ദ്ര-സംസ്ഥാന സർക്കാരുകൾ ക്രമേണ പിൻവാങ്ങിക്കൊണ്ടിരിക്കുകയാണ്. വിദ്യാഭ്യാസത്തെ രംഗത്തെ സ്വകാര്യവൽക്കരണം കുരങ്ങന്റെ കയ്യിൽ പൂമാല കൊടുക്കുന്നതിനു തുല്യമാണ്. ഈ രീതിയിൽ വിദ്യാഭ്യാസം കൊണ്ട് തീക്കളി നടത്തുന്നത് അപകടമാണ്. സമൂഹത്തിനു നാളെ ഉപകരിക്കേണ്ട ഒരു തലമുറയെ വാർത്തെടുക്കേണ്ട മേഖലയായി കാണണം വിദ്യാഭ്യാസ സ്ഥാപനങ്ങളെ.

Tuesday, February 20, 2018

സഹകരണ ബാങ്കല്ലോ സുഖപ്രദം

ഞാൻ ഇത് വരെ രണ്ടു തവണ പൊതുമേഖലാ ബാങ്കുകളിൽ ലോണിന് അപേക്ഷിച്ചിട്ടുണ്ട്. രേഖകൾ ശരിയാക്കാനും കൊടുക്കാനും എന്നെ മൂന്നു മാസത്തോളം നടത്തിച്ചു. ഒരു സർട്ടിഫിക്കറ്റ് കൊടുക്കുമ്പോൾ വേറെ പുതിയ ഒരെണ്ണം കൂടി കൊണ്ട് വരാൻ പറയും. അങ്ങനെ ബാങ്ക് പറഞ്ഞ എല്ലാ അലവലാതി രേഖകളും ഞാൻ എത്തിച്ചു കൊടുത്തു. ലോൺ ഇപ്പം കിട്ടും എന്ന പ്രതീക്ഷ പടർന്നു പന്തലിച്ചു നിന്നു. സാങ്കേതിക കാരണങ്ങൾ പറഞ്ഞു ബാങ്കുകൾ അവസാന നിമിഷം ലോൺ അനുവദിച്ചില്ല.

രണ്ടു തവണയും എന്നെ ലോൺ തന്നു സഹായിച്ചത് സഹകരണ ബാങ്കുകളാണ്. പൊതുമേഖലാ ബാങ്കിലെ മാനേജരുമായി സംസാരിക്കുമ്പോൾ തന്നെ ബാങ്കിന് നിങ്ങളോടുള്ള അവിശ്വാസം എത്രയുണ്ടെന്ന് മനസ്സിലാകും. ക്ഷണിക്കാത്ത കല്യാണത്തിന് ചെന്ന് കേറിയ പോലെയുള്ള അവസ്ഥ. സഹകരണ ബാങ്കിൽ ചെന്നാൽ നമ്മളെ അറിയുന്നവരെ അവിടെ കാണൂ. സ്വന്തം വീട്ടിൽ ചെന്ന പോലത്തെ അനുഭവം. അൽപ്പം പലിശ കൂടിയാലും സാരമില്ല, ഭാരമില്ലാത്ത മനസ്സുമായി നമുക്ക് തിരികെ പോകാം.

മുതലാളിമാർ ബാങ്കുകളെ പറ്റിച്ചു കാശു കൊണ്ട് പോയെന്നു കേട്ടപ്പോൾ ഇങ്ങനൊക്കെ സംഭവിച്ചില്ലെങ്കിലേ അത്ഭുതമുള്ളു എന്ന് തോന്നിപ്പോയി!!

Saturday, December 23, 2017

ബീഫ് ഉലര്‍ത്തിയത്

 
ചേരുവകൾ 
പോത്തിറച്ചി-1 കിലോ സവാള-2 (നീളത്തില്‍ അരിഞ്ഞത്) ചെറിയ ഉള്ളി-1 കപ്പ് (തൊലി കളഞ്ഞ് നീളത്തില്‍ അരിഞ്ഞത്) മല്ലിപ്പൊടി-2 സ്പൂണ്‍ മുളകുപൊടി-1 സ്പൂണ്‍ കുരുമുളകു പൊടി-1 സ്പൂണ്‍ മഞ്ഞള്‍പ്പൊടി-1 സ്പൂണ്‍ ഇഞ്ചി, വെളുത്തുള്ളി-1 സ്പൂണ്‍ ഗരം മസാല-അര സ്പൂണ്‍ കറുവാപ്പട്ട-ചെറിയ കഷ്ണം ഗ്രാമ്പൂ-4 പെരുഞ്ചീരകം-അര സ്പൂണ്‍ തേങ്ങാക്കൊത്ത്-അര കപ്പ് വെളിച്ചെണ്ണ കറിവേപ്പില ഉപ്പ്.

പാകം ചെയ്യുന്ന വിധം
ബീഫ് ചെറിയ കഷ്ണങ്ങളാക്കി കഴുകി ഉപ്പ്, മഞ്ഞള്‍പ്പൊടി എന്നിവ ചേര്‍ത്ത് വയ്ക്കുക. ഗ്രാമ്പൂ, കറുവാപ്പട്ട, പെരുഞ്ചീരകം എന്നിവ വറുത്തു പൊടിക്കുക. ഇതും ബാക്കി മസാലപ്പൊടികളും ഇഞ്ചി,വെളുത്തുള്ളി പേസ്റ്റ്എന്നിവയും ഇറച്ചില്‍ പുരട്ടി വയ്ക്കുക. കറിവേപ്പിലയും ചേര്‍ക്കുക. ഇത് 1 മണിക്കൂര്‍ വയ്ക്കണം. പിന്നീടിത് അധികം വെള്ളം ചേര്‍ക്കാതെ വേവിച്ചെടുക്കണം. വേവിച്ച ഇറച്ചിയില്‍ നിന്നും വെള്ളം പൂര്‍ണമായും വറ്റിച്ചെടുക്കണം. ഒരു ചീനച്ചട്ടിയില്‍ വെളിച്ചെണ്ണ ചൂടാക്കുക. ഇതിലേക്ക് ചെറിയ ഉള്ളി, സവാള എന്നിവ ചേര്‍ത്ത് ബ്രൗണ്‍ നിറമാകും വരെ വഴറ്റണം. ഇതിലേക്ക് വേവിച്ചു വച്ചിരിക്കുന്ന ബിഫ് ഇട്ട് ഇളക്കുക. അല്‍പസമയത്തിനു ശേഷം നാളികേരക്കൊത്തും ചേര്‍ത്ത് ഇളക്കി വാങ്ങി വയ്ക്കാം.
 
കടപ്പാട്: ഹബീബ് മൂസ, ചങ്ങനാശ്ശേരി

Friday, October 27, 2017

ആന ചാടി കുത്തു വെള്ളച്ചാട്ടം


ദൈനംദിന ജോലി ഭാരത്തിൽ നിന്ന് ഓടിയൊളിച്ചു കൊണ്ട് വെള്ളച്ചാട്ടത്തിന്റെ കുളിർമ്മയിൽമുങ്ങിപ്പൊങ്ങാൻ ആരാണ് ആഗ്രഹിക്കാത്തത്. കേരളത്തിന് പുറത്തുള്ള വെള്ളച്ചാട്ടങ്ങൾ (കുറ്റാലം) തിക്കും തിരക്കും നിറഞ്ഞതും, വൃത്തിഹീനവുമാണ്. അവിടങ്ങളിൽ എത്താൻ കൂടുതൽ ദൂരം യാത്ര ചെയ്യേണ്ടിയും വരും. മദ്ധ്യ തിരുവിതാംകൂറുകാർക്കു എളുപ്പത്തിൽ എത്തിച്ചേരാവുന്ന അതിമനോഹരമായ ഒരു വെള്ളച്ചാട്ടമാണ് ആന ചാടി കുത്തു. പണ്ടൊരിക്കൽ വെള്ളച്ചാട്ടത്തിന്റെ മുകൾ ഭാഗത്തു രണ്ടു കരിവീരന്മാർ കൊമ്പ് കോർക്കുകയും അതിലൊരു വീരൻ ഉരുണ്ടു താഴെ വീഴുകയും ചെയ്‌തു. അതിനാലാണ് ഈ വെള്ളച്ചാട്ടത്തിനു ആന ചാടി കുത്തു എന്ന പേര് വന്നതെന്ന് പരിസരവാസികൾ പറഞ്ഞു തന്നു. വെള്ളച്ചാട്ടങ്ങൾ സാധാരണ ഗതിയിൽ അപകട സാധ്യത ഏറിയ മേഖലകളാണ്. ഇതിനടുത്തുള്ള തൊമ്മൻ കുത്തു വെള്ളച്ചാട്ടം അപകട സാധ്യത ഏറെ ഉള്ള സ്ഥലമാണ്. സഞ്ചാരികൾക്ക് വെള്ളത്തിൽ ഇറങ്ങാൻ അനുവാദവുമില്ല. അവിടെ ചെന്ന് വെള്ളച്ചാട്ടത്തിന്റെ മനോഹാരിത മാറി നിന്ന് ആസ്വദിച്ചു തിരിച്ചു വരാനേ നിർവാഹം ഉള്ളു. എന്നാൽ ആന ചാടി കുത്തു വെള്ളച്ചാട്ടം അപകട രഹിതവും, അതിമനോഹരവുമാണ്. ജലപാതത്തിന്റെ ചുവട്ടിൽ നിന്ന് കൊണ്ട് കുളിർമ്മ ആസ്വദിക്കുകയും ചെയ്യാം.

എങ്ങനെ എത്തിച്ചേരാം
കോട്ടയം ഭാഗത്തു നിന്ന് വരുന്നവർ തൊടുപുഴ ടൗണിൽ നിന്നും (ഇരുപതു കിലോമീറ്റർ ദൂരം) തൊമ്മൻ കുത്തു ജംഗ്ഷനിൽ എത്തി വണ്ണപ്പുറം പോകുന്ന വഴി ഒരു കിലോമീറ്റർ താഴെ മാത്രം ദൂരം സഞ്ചരിച്ചു ആന ചാടി കുത്തിൽ എത്താം. ബസ്സിൽ വരുന്നവർ തൊടുപുഴയിൽ നിന്ന് കയറി തൊമ്മൻ കുത്തു ജംഗ്ഷനിൽ ഇറങ്ങി, ഓട്ടോ പിടിച്ചു വെള്ളച്ചാട്ടത്തിന്റെ കുറച്ചു കുറച്ചകലെ എത്താം. കുറച്ചു റബ്ബർ തോട്ടത്തിനുള്ളിലൂടെ നടന്നു വേണം ജലപാതത്തിൽ എത്താൻ. അവധി ദിനങ്ങളിൽ വെള്ളച്ചാട്ടത്തിൽ കുളിക്കാൻ വരുന്നവരുടെ തിരക്ക് കൂടുതലാണ്. കാറിൽ വരുന്നവർ സമീപ വാസികളുടെ പുരയിടത്തിൽ വേണം പാർക്ക് ചെയ്യാൻ. ഇരുപതു രൂപ പാർക്കിംഗ് ഫീസ് പുരയിടത്തിന്റെ ഉടമസ്ഥർ വാങ്ങുന്നുണ്ട്. കീഴ്‍ക്കാം തൂക്കായ ഒരു മുട്ടക്കുന്നു വലിഞ്ഞു കയറി വേണം വെള്ളച്ചാട്ടത്തിൽ എത്താൻ. മഴക്കാല മാസങ്ങളിൽ മാത്രമേ വെള്ളച്ചാട്ടം മുഴുവൻ ഭംഗിയിൽ ആസ്വദിക്കാൻ കിട്ടൂ. ജൂലൈ മുതൽ ഒക്ടോബർ മാസം വരെ വെള്ളച്ചാട്ടം സന്ദർശിക്കാൻ അനുയോജ്യമായ സമയം.
കുളിക്കാനിറങ്ങാം
വെള്ളച്ചാട്ടത്തിൽ ഇറങ്ങാനുള്ള തയ്യാറെടുപ്പോടു കൂടി വേണം ഇവിടെ വരാൻ. നീണ്ടു നിവർന്ന പാറക്കു മുകളിലൂടെ വെള്ളം പരന്നു ഒഴുകി താഴേക്ക് ചാടുന്നു. ശ്രദ്ധിച്ചു നോക്കിയാൽ ജലപാതത്തിന്റെ മുകൾ ഭാഗത്തെ പാറ ആനയുടെ പുറം പോലെ തോന്നും. ചരൽ നിറഞ്ഞ വെള്ളച്ചാട്ടത്തിന്റെ താഴ്ഭാഗത്തു ഇറങ്ങി നിൽക്കാം. മുട്ടറ്റം വെള്ളമേ ഉണ്ടാവുകയുള്ളു. ജലപാതത്തിന്റെ താഴെ നിന്നാൽ വെള്ളം ചരൽ വാരി എരിയുന്ന പോലെ ശരീരത്തിൽ വീഴും. ഇത്രയും അടുത്തു നിന്ന് വെള്ളച്ചാട്ടത്തിൽ കുളിച്ചു തിമിർക്കാൻ വേറെ ഒരിടത്തും അവസരം ഉണ്ടാവുകയില്ല. വെള്ളച്ചാട്ടത്തിന്റെ ചുറ്റും നല്ല പച്ചപ്പ്‌ ആണ്.
ഫോട്ടോ: നജീബ് കാസിം


 ഭരത വാക്യം: ആന ചാടി കുത്തു വെള്ളച്ചാട്ടം ജനശ്രദ്ധയിൽ വന്നിട്ട് അധികം നാളായിട്ടില്ല. മലയാളിയുടെ മര്യാദകേടിന്റെ അടയാളങ്ങൾ വെള്ളച്ചാട്ടത്തിന്റെ സമീപത്തു മാലിന്യ കൂമ്പാരമായി കാണാം. ഭക്ഷണ അവശിഷ്ടങ്ങൾ, മദ്യക്കുപ്പികൾ, വലിച്ചെറിഞ്ഞ പാദരക്ഷകൾ, തുണികൾ തുടങ്ങിയവ ജലപാത പരിസരത്തു കുന്നുകൂടി തുടങ്ങിയിരിക്കുന്നു. മദ്യപിച്ചു എത്തുന്നവരെയും കാണാൻ സാധിക്കും. മാലിന്യം നിക്ഷേപിക്കാതെ ജലപാതത്തിന്റെ ഭംഗി ആസ്വദിച്ച് തിരികെ വരുക.

Thursday, October 5, 2017

ധർമസ്യ തത്വം നിഹിതം ഗുഹായാം

ഡോ. സുനിൽ ഇളയിടത്തിന്റെ "മഹാഭാരതത്തിന്റെ സാംസ്‌കാരിക ചരിത്രം" എന്ന ബൃഹത് പ്രഭാഷണ പാരമ്പര രണ്ടു മാസം കൊണ്ട് കേട്ടു തീർത്തു. വൈരുദ്ധ്യങ്ങളുടെ ആകെത്തുകയാണ് ജീവിതം എന്ന് മഹാഭാരതം പറയുന്നു. സത്യത്തിനുള്ളിൽ അസത്യത്തെ, ധർമ്മത്തിനുള്ളിൽ അധർമ്മത്തെ, നന്മക്കുള്ളിൽ തിന്മയെ, വിജയത്തിനുള്ളിൽ പരാജയത്തെ മഹാഭാരതം നമുക്ക് കാണിച്ചു തരുന്നു. മഹാഭാരത തത്വം ചുരുക്കിപറഞ്ഞാൽ;

ധർമസ്യ തത്വം നിഹിതം ഗുഹായാം
(The essence of right conduct is a very subtle secret) 

ജീവിത ജ്ഞാനത്തെ മഹാഭാരതത്തിൽ ആവിഷ്‌ക്കരിച്ച വ്യാസനെ നമിക്കാതെ വയ്യ: 

നമോസ്‍തുതേ വ്യാസ വിശാല ബുദ്ധേ 
ഫുല്ലരവിന്ദതായത പത്ര നേത്രാ 
യേന ത്വയാ ഭാരത തൈല പൂർണ്ണാ 
പ്രജ്വോലിതോ ജ്ഞാന പ്രദീപ ഹ 

പ്രഭാഷണം ശബ്‌ദ രൂപത്തിൽ താഴെ കൊടുത്തിരിക്കുന്ന ലിങ്കിൽ കിട്ടും. 

യൂട്യുബിലും ലഭ്യമാണ് 

Wednesday, September 13, 2017

വിശ്വഭാരതി സർവ്വകലാശാല

രബീന്ദ്രനാഥ ടാഗോർ 
രബീന്ദ്രനാഥ ടാഗോറിന്റെ സ്വാധീനം ബംഗാളിന്റെ സാംസ്‌കാരിക മണ്ഡലവുമായി ഇഴുകി ചേർന്ന് കിടക്കുകയാണ്. ടാഗോറിന്റെ സംഭാവനകൾ സംഗീതം, സാഹിത്യം, ചിത്രകല എന്നീ മേഖലകളെ പ്രത്യേക ശാഖകളാക്കി വളർത്തിയിട്ടുണ്ട്. ബംഗാളികൾക്ക് ഗുരുദേവനാണ് ടാഗോർ. ടാഗോറിന്റെ ഏകലോക ദർശനത്തിനു ഉത്തമ ഉദാഹരണമാണ് വിശ്വഭാരതി സർവ്വകലാശാല. ലോകത്തെ മുഴുവൻ ഒരു കിളിക്കൂടായിട്ടാണ് ആണ് ടാഗോർ ദർശിച്ചത്. അവിടെ വിഭിന്ന ദേശീയതകളുടെ അതിരുകളില്ല. "യത്ര വിശ്വം ഭവത്യേക നീഢം" (Where the whole world meets in a single nest) എന്നതാകുന്നു ഈ സർവ്വകലാശാലയുടെ ആപ്‌തവാക്യം. പരമ്പരാഗത സർവ്വകലാശാലകളുടെ പ്രവർത്തന രീതികളിൽ നിന്നും വ്യതിചലിച്ചു കൊണ്ടുള്ള വിദ്യാഭ്യാസ രീതിയാണ് ടാഗോർ വിശ്വഭാരതിയിലൂടെ വിഭാവന ചെയ്‌തത്‌. ഒരു ചെറിയ വിദ്യാലയം  എന്ന രീതിയിൽ തുടങ്ങുകയും, ടാഗോറിന് ലഭിച്ച നോബൽ സമ്മാന തുക ഉപയോഗിച്ച് സർവ്വകലാശാലയായി വിപുലീകരിക്കുകയും ചെയ്‌തു. ഇപ്പോൾ ഇതൊരു കേന്ദ്ര യൂണിവേഴ്‌സിറ്റി ആണ്. പടിഞ്ഞാറൻ ബംഗാൾ സംസ്ഥാനത്തിലെ ബിർഭും എന്ന ജില്ലയിലെ ശാന്തിനികേതൻ എന്ന ചെറിയ പ്രദേശത്താണ് വിശ്വഭാരതി സർവ്വകലാശാല സ്ഥിതി ചെയ്യുന്നത്. കൊൽക്കത്തയിൽ നിന്നും നൂറ്റി അൻപതോളം കിലോമീറ്റർ അകലെയാണ് സർവ്വകലാശാല സ്ഥിതി ചെയ്യുന്നത്.

Wednesday, August 16, 2017

ദൂധ്‌ സാഗർ വെള്ളച്ചാട്ടം (യാത്രാ വിവരണം)

സഞ്ചാര പ്രേമികൾക്ക് വ്യത്യസ്‌ത യാത്രാനുഭവം സമ്മാനിക്കുന്നതാണ് ദൂധ്‌ സാഗർ വെള്ളച്ചാട്ടവും (Dudhsagar Falls), അങ്ങോട്ടുള്ള നടത്തവും. റെയിൽ പാതയിലൂടെയുള്ള 20 (ഇരുവശത്തേക്കും) കിലോമീറ്റർ നീളുന്ന നടത്തവും, പാല് പോലെ പതഞ്ഞൊഴുകുന്ന വളരെ  ഉയരത്തിൽ നിന്നുള്ള വെള്ളച്ചാട്ടവും നൽകുന്ന അനുഭവം അവർണ്ണനീയമാണ്. ഇത്രയും വ്യത്യസ്‌തതയുള്ള ജലപാതം കാണാനുള്ള യാത്ര ലോകത്തെവിടെയെങ്കിലും ഉണ്ടോ എന്നത് പരിശോധിക്കേണ്ടതുണ്ട്. നമ്മൾ കാണാൻ പോകുന്നത് ഇന്ത്യയിലെ തന്നെ ഏറ്റവും ഉയരം (310 മീറ്റർ) കൂടിയ മൂന്നാമത്തെ ജലപാതം ആണ്. ഗോവ സംസ്ഥാനത്തിൽ ഉള്ള മണ്ഡോവി (Mandovi) നദിയുടെ സംഭാവനയാണ് ഈ വെള്ളച്ചാട്ടം.

ദൂധ്‌ സാഗർ വെള്ളച്ചാട്ടം