കോട്ടക് ബാങ്കിന്റെ സീറോ ബാലൻസ് അക്കൗണ്ട്

ബേസിക് സേവിങ്സ് ബാങ്ക് ഡെപ്പോസിറ്റ് അക്കൗണ്ട് (Basic Savings Bank Deposit Account) പ്രധാനമന്ത്രി ജൻ ധൻ യോജന എന്ന പദ്ധതിയുടെ ഭാഗമാണ്. മറ്റു സേവിങ്സ് അക്കൗണ്ടുകളിൽ ഒരു നിശ്ചിത തുക മിച്ചം സൂക്ഷിച്ചില്ലെങ്കിൽ പിഴ ഈടാക്കും. ബേസിക് സേവിങ്സ് ബാങ്ക് ഡെപ്പോസിറ്റ് അക്കൗണ്ടിൽ മിനിമം ബാലൻസ് സൂക്ഷിക്കേണ്ടതില്ല. ജനങ്ങളെ ബാങ്കിങ് സേവനങ്ങളുമായി കൂടുതൽ പരിചയം ഉണ്ടാക്കുക എന്നതായിരുന്നു 2014 ൽ തുടങ്ങിയ പ്രധാനമന്ത്രി ജൻ ധൻ യോജന പദ്ധതിയുടെ പ്രധാന ലക്‌ഷ്യം. അക്കൗണ്ട് ഉടമക്ക് റൂപേ ഡെബിറ്റ് കാർഡ്, ഒരു ലക്ഷം രൂപയുടെ ഇൻഷുറൻസ് പരിരക്ഷയും ലഭിക്കും. ചെറിയ തുകകൾ സൂക്ഷിക്കാനും, യൂപിഐ ആപ്പുകളിൽ ചേർക്കാനും സീറോ ബാലൻസ് അക്കൗണ്ട് അനുയോജ്യമാണ്. 

സ്വകാര്യ, പൊതുമേഖല ബാങ്കുകൾ സീറോ ബാലൻസ് അക്കൗണ്ടുകൾ ലഭ്യമാക്കണം എന്നതായിരുന്നു നിബന്ധന. ഇത് പ്രകാരം സീറോ ബാലൻസ് അക്കൗണ്ടുകൾ ലഭ്യമാണെന്ന കാര്യം എല്ലാ ബാങ്കുകളുടേയും വെബ്‌സൈറ്റിൽ ഉണ്ട്. അക്കൗണ്ട് എടുക്കാൻ ബാങ്കിൽ ചെന്ന് കഴിഞ്ഞാൽ ഉഴപ്പൻ സമീപനമാണ് ജീവനക്കാർ സ്വീകരിക്കുന്നത്. ഈ ബ്രാഞ്ചിൽ സീറോ ബാലൻസ് അക്കൗണ്ട് ഇല്ല, സീറോ ബാലൻസ് അക്കൗണ്ട് കൊള്ളില്ല, മറ്റു സേവിങ്സ് അക്കൗണ്ട് എടുത്തു കൂടെ എന്നിങ്ങനെ പല തരത്തിലുള്ള ചോദ്യങ്ങൾ ജീവനക്കാരുടെ ഭാഗത്തു നിന്നും ഉണ്ടാകും. ചുരുക്കം പറഞ്ഞാൽ സീറോ ബാലൻസ് അക്കൗണ്ട് എടുക്കാൻ ചെല്ലുന്നവരെ നിരുത്സാഹപ്പെടുത്തി തിരിച്ചയക്കുന്ന രീതിയാണുള്ളത്. ജീവനക്കാരോട് തർക്കിക്കാനും, ചോദ്യം ചെയ്യാനും സമയമില്ലാത്തതിനാൽ ആരും സീറോ ബാലൻസ് അക്കൗണ്ട് എടുക്കാൻ പിന്നീട് ശ്രമിക്കാറില്ല. ബേസിക് സേവിങ്സ് ബാങ്ക് ഡെപ്പോസിറ്റ് അക്കൗണ്ട് ഒഴികെ എല്ലാ സേവിങ്സ് അക്കൗണ്ടുകളും ഓൺലൈൻ ആയി തുറക്കാനുള്ള സൗകര്യങ്ങൾ ബാങ്കുകൾ ലഭ്യമാക്കിയിട്ടുണ്ട്. 

കൊട്ടക് മഹിന്ദ്ര ബാങ്ക് ഓൺലൈൻ ആയി സീറോ ബാലൻസ് അക്കൗണ്ട് തുറക്കാനുള്ള സൗകര്യം ഏർപ്പെടുത്തിയ അപൂർവ്വം ബാങ്കുകളിൽ ഒന്നാണ്. Kotak811 എന്ന ആപ്പ് പ്ളേ സ്റ്റോറിൽ നിന്നും ഇൻസ്റ്റാൾ ചെയ്തു അക്കൗണ്ട് തുറക്കാം. വെബ്‌സൈറ്റിൽ നിന്നും സീറോ ബാലൻസ് അക്കൗണ്ട് തുറക്കാവുന്നതാണ്. വീഡിയോ കെവൈസി ഉണ്ടാവും. ഡെബിറ്റ് കാർഡ് ആവശ്യമെങ്കിൽ 299 രൂപ അടച്ചാൽ ലഭ്യമാണ്. ബേസിക് അക്കൗണ്ട് കിട്ടിക്കഴിഞ്ഞാൽ Kotak811 ആപ്പ്  കളയാവുന്നതാണ്. ബാങ്കിങ് ആപ്പ് ഇൻസ്റ്റാൾ ചെയ്തു കൊണ്ട്, ബാങ്കിങ് സേവനങ്ങൾ ആരംഭിക്കാവുന്നതാണ്. 

എന്ത് കൊണ്ട് ക്രെഡിറ്റ് കാർഡ് ഉപയോഗിക്കണം

Image courtesy: cardinfo.in

സാങ്കേതികവിദ്യ ജീവിതത്തിന്റെ എല്ലാ മേഖലകളിലും പിടിമുറുക്കി കഴിഞ്ഞിരിക്കുന്നു. സാങ്കേതികവിദ്യ ഒഴിവാക്കി ജീവിക്കുകയെന്നത് ഇന്ന് തീരെ സാധ്യമല്ല. ഭൂരിഭാഗം പേരുടേയും വരുമാനത്തിൽ കുത്തനെ വർദ്ധന ഉണ്ടാകുന്നില്ല. അതേ സമയം ദൈനംദിന ചിലവുകൾ അടിക്കടി വർദ്ധിക്കുകയും ചെയ്യുന്നു. ദിവസ/മാസ വരുമാനക്കാരെ സംബന്ധിച്ചു പണം വരുന്നതും, ചിലവാകുന്നതും ദ്രുതഗതിയിലാണ്. ശമ്പള ദിനങ്ങൾ കഴിഞ്ഞാൽ വിവിധ ആവശ്യങ്ങൾക്ക് ബന്ധുക്കളോടും, സുഹൃത്തക്കളോടും പണം കടം വാങ്ങേണ്ടി വരുന്നത് വിഷമകരമാണ്. അവരും സാമ്പത്തിക പ്രതിസന്ധി അഭിമുഖീകരിക്കുന്നുണ്ടാവും. ഒഴിവാക്കാനാവാത്ത ദൈനംദിന ചിലവുകളെ കാര്യക്ഷമമായി കൈകാര്യം ചെയ്യാൻ സാമ്പത്തിക ഉപാധികൾ കണ്ടെത്തേണ്ടത് സുഗമമായ ജീവിതത്തിനു ആവശ്യമാണ്.

ബില്ലുകൾ, നിത്യോപയോഗ സാധനങ്ങൾ, മറ്റു അത്യാവശ്യ വസ്തുക്കൾ എല്ലാം തന്നെ ഡിജിറ്റൽ പണമിടപാടിലൂടെ നടത്താൻ കഴിയും. ഇലക്ട്രോണിക് വിനിമയം കൂടി വരുന്ന ഇക്കാലത്തു പണം ഫലപ്രദമായി കൈകാര്യം ചെയ്യാൻ നിരവധി ഉപാധികളുണ്ട്. യൂപിഐ, ഡെബിറ്റ് കാർഡ് എന്നീ പ്രീപെയ്ഡ് സാദ്ധ്യതകൾ വ്യാപകമായി ഉപയോഗിച്ച് വരുന്നു. അക്കൗണ്ടിൽ പണം ഉണ്ടെങ്കിൽ മാത്രമേ പ്രീപെയ്ഡ് രീതിയിലുള്ള സങ്കേതങ്ങൾ ഉപയോഗിക്കാനാവൂ. പാചകവാതകം, വൈദ്യുതി, വെള്ളം, ഇൻഷുറൻസ്, തുടങ്ങിയ അടവുകൾ മുടങ്ങിയാൽ ജീവിതം സ്തംഭിക്കുന്ന അവസ്ഥയിൽ എത്തിച്ചേരും. ഇത്തരം അവസരങ്ങളിൽ സാമ്പത്തിക ബുദ്ധിമുട്ടിനെ സമർത്ഥമായി നേരിടാൻ ക്രെഡിറ്റ് കാർഡ് മതിയാവും. ക്രെഡിറ്റ് കാർഡുകൾ ഉപയോഗിച്ച് ധനവിനിമയം നടത്തുമ്പോൾ ധാരാളം ഇളവുകളും, സൗജന്യങ്ങളും ലഭിക്കും.

എന്താണ് ക്രെഡിറ്റ് കാർഡ്?

പണം കടമായി കിട്ടാനുള്ള ഒരു സാമ്പത്തിക ഉപാധിയാണ് ക്രെഡിറ്റ് കാർഡ്. മാസ വരുമാനത്തിന്റെ രണ്ടോ, മൂന്നോ ഇരട്ടിയായിരിക്കും ക്രെഡിറ്റ് കാർഡ് വഴി കടം കിട്ടുന്ന പണത്തിന്റെ പരിധി. സാധാരണ ബാങ്ക് ലോണിൽ നിന്നും വ്യത്യസ്തമാണ് ക്രെഡിറ്റ് കാർഡ്. ലോണിനു അപേക്ഷിക്കുമ്പോൾ ഓരോ തവണയും അപേക്ഷയും, ഈടും നൽകണം. ക്രെഡിറ്റ് കാർഡ് ലഭിക്കാൻ ഒറ്റ തവണ മാത്രം അപേക്ഷയും, വരുമാനം തെളിയിക്കുന്ന രേഖകളും നൽകിയാൽ മതിയാവും, തുടർച്ചയായി പണം കടം കിട്ടും. ഡെബിറ്റ് കാർഡിന് സമാനമായ പ്ലാസ്റ്റിക് കാർഡും ബാങ്കിൽ നിന്നും ലഭിക്കും. POS മെഷീനുകളിൽ സ്വൈപ്പ് ചെയ്യാം, ഓൺലൈൻ ഷോപ്പിംഗ് സൈറ്റുകളിൽ കാർഡ് വിവരങ്ങൾ നൽകി ഇടപാടുകൾ നടത്താം.

ക്രെഡിറ്റ് കാർഡ് ഉപയോഗിച്ച് ഏതൊക്കെ ഇടപാടുകൾ നടത്താം?

ബില്ലുകൾ അടക്കൽ (വൈദ്യുതി, ഇന്റർനെറ്റ്, വെള്ളം, ഇൻഷുറൻസ്, വീട്ടുവാടക എന്നിവ).

വിനോദ ഉപാധികൾ (സിനിമ ടിക്കറ്റ്, ഒടിടി വരിസംഖ്യ).

ഓൺലൈനും, അല്ലാത്തതുമായ ഷോപ്പിംഗ്.

ട്രെയിൻ, ബസ്, വിമാന ടിക്കറ്റുകളുടെ ബുക്കിംഗ്.

മൊബൈൽ റീചാർജിങ്.

പാചകവാതക ബുക്കിംഗ്.

ഗിഫ്റ്റ് കാർഡുകൾ വാങ്ങുന്നതിന്.

വാലറ്റുകളിലേക്കു പണം ഇടുന്നതിനും ഉപയോഗിക്കാം.

ക്രെഡിറ്റ് കാർഡ് ഉപയോഗിക്കുന്നത് കൊണ്ടുള്ള നേട്ടങ്ങൾ എന്തൊക്കെയാണ്?

ക്രെഡിറ്റ് കാർഡ് ലഭിക്കുമ്പോൾ തന്നെ വിവിധ തുകയുടെ (ഉദാ. 500, 1000) ഷോപ്പിംഗ് ഗിഫ്റ്റ് വൗച്ചറുകൾ ഉപഭോക്താവിന് നൽകാറുണ്ട്.

ഓരോ ഇടപാട് നടത്തുമ്പോഴും നടത്തുമ്പോൾ കിട്ടുന്ന ഇളവുകൾ. ഉദാഹരണമായി, വിവിധതരം ബില്ലുകൾ അടയ്ക്കുമ്പോൾ 1 മുതൽ 5 ശതമാനം വരെ ഇളവ് നൽകാറുണ്ട്. ഇളവുകൾ റിവാർഡ് പോയിന്റുകളായോ, ക്യാഷ് ബാക്കായോ തരും. റിവാർഡ് പോയിന്റുകൾ ഉപയോഗിച്ച് ഷോപ്പിംഗ് നടത്താം, അല്ലാത്ത പക്ഷം ബില്ലിൽ തന്നെ ആ തുക കുറച്ചു തരും.

കാർഡ് ഉപയോഗിക്കുന്നത് കൊണ്ട് ക്രെഡിറ്റ് സ്കോർ മെച്ചപ്പെടാൻ ഇടയാകുന്നു. മെച്ചപ്പെട്ട ക്രെഡിറ്റ് സ്‌കോർ ഉള്ളവർക്ക് കുറഞ്ഞ പലിശ നിരക്കിൽ ലോണുകൾ, മറ്റു ക്രെഡിറ്റ് കാർഡുകൾ ലഭിക്കാനുള്ള സാധ്യത കൂടുന്നു.

എയർപോർട്ട്/റെയിൽവേ ലോഞ്ച് സൗജന്യമായി ഉപയോഗിക്കാനുള്ള അവസരം. വിമാനത്താവളത്തിനുള്ളിലെ പണം കൊടുത്തു ഉപയോഗിക്കാനുള്ള വിശ്രമ സങ്കേതമാണ് ലോഞ്ച്. അവിടെ ഭക്ഷണശാല, കഫറ്റീരിയ, വിശ്രമിക്കാനുള്ള ഇടം, കമ്പ്യൂട്ടർ സൗകര്യം എന്നിവയുണ്ടാകും. വർഷത്തിൽ എത്ര തവണ സൗജന്യമായി ലോഞ്ച് ഉപയോഗിക്കാമെന്നത് കാർഡിന്റെ ഇനം അനുസരിച്ചു വ്യത്യാസപ്പെട്ടിരിക്കും.

ക്രെഡിറ്റ് കാർഡ് എങ്ങിനെ കിട്ടും?

ബാങ്കിങ് സ്ഥാപനങ്ങളാണ് ക്രെഡിറ്റ് കാർഡുകൾ വിതരണം ചെയ്യുന്നത്. ബാങ്കിന്റെ വെബ്സൈറ്റ് സന്ദർശിച്ചു ഓൺലൈൻ ആയോ, ബ്രാഞ്ച് സന്ദർശിച്ചു നേരിട്ടും അപേക്ഷ കൊടുക്കാവുന്നതാണ്. ഓൺലൈൻ വഴി അപേക്ഷ സമർപ്പിച്ചാൽ ബാങ്കിൽ നിന്നും നേരിട്ട് വെരിഫിക്കേഷൻ നടത്താൻ ജീവനക്കാർ വന്നേക്കാം. ബ്രാഞ്ച് വഴി അപേക്ഷ സമർപ്പിച്ചാൽ വെരിഫിക്കേഷൻ നടത്തിയ ശേഷമാവും ജീവനക്കാർ അപേക്ഷ അപ്‌ലോഡ് ചെയ്യുന്നത്.

ക്രെഡിറ്റ് കാർഡ് കിട്ടാൻ എന്തൊക്കെ രേഖകൾ സമർപ്പിക്കണം?

അപേക്ഷകന്റെ മേൽവിലാസം തെളിയിക്കാൻ ഉതകുന്ന രേഖകൾ; ആധാർ കാർഡ്, പാൻ കാർഡ്, വോട്ടർ ഐഡി കാർഡ് ഇവയിൽ ഏതെങ്കിലും ഒന്ന് മതിയാവും.

വരുമാനം തെളിയിക്കാൻ ശമ്പള സ്ലിപ്, വരുമാന നികുതി അടച്ചതിന്റെ രേഖകൾ, ബാങ്ക് സ്റ്റേറ്റ്മെന്റ് ഇവയിൽ ഏതു വേണമെങ്കിലും ബാങ്ക് ആവശ്യപ്പെടാൻ സാധ്യതയുണ്ട്. മിക്കവാറും വരുമാനനികുതി അടച്ചതിന്റെ രേഖകൾ ബാങ്കുകൾ ആവശ്യപ്പെടാറുണ്ട്. അതില്ലാത്തവർ വിഷമിക്കേണ്ട കാര്യമില്ല, ചില ബാങ്കുകൾ ബാങ്ക് സ്റ്റേറ്റ്മെന്റ് മാത്രമേ വരുമാനം തെളിയിക്കാൻ ആവശ്യപ്പെടാറുള്ളൂ. അത്തരം കാർഡുകൾ കണ്ടുപിടിച്ചു അപേക്ഷിക്കുക, ഉദാ. ബാങ്ക് ഓഫ് ബറോഡ സ്നാപ്പ് ഡീൽ (BOB Snapdeal) ക്രെഡിറ്റ് കാർഡ്. വലിയ പ്രചാരമില്ലാത്ത ക്രെഡിറ്റ് കാർഡുകളുടെ വിതരണം കൂട്ടാൻ അധികം രേഖകൾ ചോദിച്ചു ഉപഭോക്താക്കളെ വിഷമിപ്പിക്കാറില്ല. ഫിക്സഡ് ഡിപ്പോസിറ്റ് ഇട്ടാൽ അതിന്റെ ഈടിൽ ക്രെഡിറ്റ് കാർഡ് അനുവദിക്കുന്ന ബാങ്കുകൾ ഉണ്ട്, ഉദാ. One Card, IDFC card.

ഓൺലൈൻ അപേക്ഷയാണെങ്കിൽ വീഡിയോ KYC ഉണ്ടാവും. യഥാർത്ഥ ആധാർ/പാൻകാർഡ് കാമറ വഴി കാണിച്ചു കൊടുക്കണം. പാൻകാർഡ് നമ്പർ ഉപയോഗിച്ച് കൊണ്ട് അപേക്ഷകന്റെ ക്രെഡിറ്റ് സ്കോർ കൂടി പരിശോധിച്ച ശേഷമാവും കാർഡ് അനുവദിക്കുന്നതിൽ തീരുമാനമെടുക്കുന്നത്. CIBIL ആണ് ബാങ്കുകൾ ഉപയോഗിക്കുന്ന ക്രെഡിറ്റ് സ്കോർ. അപേക്ഷ നൽകുന്നതിന് മുൻപ് CBIL വെബ്സൈറ്റ് സന്ദർശിച്ചു സ്കോർ അറിയാവുന്നതാണ്. വിവിധ മാനദണ്ഡങ്ങൾ പരിഗണിച്ചാണ് ക്രെഡിറ്റ് കാർഡ് അപേക്ഷയിൽ ബാങ്ക് അന്തിമ തീരുമാനമെടുക്കുന്നത്. ക്രെഡിറ്റ് സ്കോർ കൂടുതൽ ഉള്ളത് കൊണ്ട് ക്രെഡിറ്റ് കാർഡ് കിട്ടണമെന്നില്ല.

ക്രെഡിറ്റ് സ്കോർ എങ്ങിനെ കിട്ടും?

ബാങ്കിങ് ഇടപാടുകൾ തീരെയില്ലാത്തവർക്ക് ക്രെഡിറ്റ് സ്കോർ ഉണ്ടാവില്ല. വിവിധ തരം ലോണുകൾ (വാഹന, ഗൃഹ, സ്വർണ്ണ പണയ വായ്പ്പകൾ), ഓൺലൈൻ ഷോപ്പിംഗ് സൈറ്റുകളിലെ പേ ലേറ്റർ (Pay Later), ഇഎംഐ വായ്‌പകൾ എടുക്കുകയും കൃത്യമായി അടക്കുകയും ചെയ്യുന്നവർക്ക് ക്രെഡിറ്റ് സ്കോർ ഉണ്ടാവും.

ക്രെഡിറ്റ് സ്കോർ തീരെയില്ലാത്തവർക്കു കുറച്ചു നാൾ കൊണ്ട് ഉണ്ടാക്കിയെടുക്കാവുന്നതാണ്. മുകളിൽ പറഞ്ഞ ഏതെങ്കിലും വായ്‌പകൾ എടുത്തു ക്രമേണ മികച്ച ക്രെഡിറ്റ് സ്കോർ വളർത്തിയെടുക്കാം. ക്രെഡിറ്റ് സ്കോർ വളർത്തിയെടുക്കും വരെ കാത്തിരിക്കാൻ ക്ഷമയില്ലാത്തവർ ഫിക്സഡ് ഡെപ്പോസിറ്റ് ഇട്ടു കൊണ്ട് അനുവദിക്കുന്ന കാർഡിന് അപേക്ഷിക്കുക. ഏതാനും മാസത്തെ ക്രെഡിറ്റ് കാർഡ് ബിൽ അടച്ചു കഴിയുമ്പോൾ ക്രെഡിറ്റ് സ്കോർ മികച്ച നിലയിൽ എത്തിയിട്ടുണ്ടാവും. മികച്ച ക്രെഡിറ്റ് സ്കോർ ആയ ശേഷം മറ്റു ക്രെഡിറ്റ് കാർഡുകൾക്കു അപേക്ഷിക്കാം.

ക്രെഡിറ്റ് കാർഡുകൾക്കു ഫീസ് ഉണ്ടോ?

ജോയിനിംഗ് ഫീസ്, വാർഷിക വരിസംഖ്യ എന്നിങ്ങനെ രണ്ടു തരം ചാർജുകളാണ് ഉപഭോക്താവിൽ നിന്ന് കാർഡുകൾ പൊതുവേ ഈടാക്കുന്നത്. മുകളിൽ പറഞ്ഞ രണ്ടു തരം ഫീസുകൾ ഈടാക്കാത്ത കാർഡുകളും ഉണ്ട്, അത്തരം കാർഡുകൾ Life Time Free (LTF) കാർഡുകൾ എന്നാണറിയപ്പെടുന്നത്. ഒരു നിശ്ചിത തുക ഒരു വർഷം കാർഡ് ഉപയോഗിച്ച് ചിലവാക്കുകയാണെങ്കിൽ വാർഷിക വരിസംഖ്യ ഒഴിവാക്കിക്കൊടുക്കുന്ന നയമാണ് മിക്ക കാർഡുകളും പിന്തുടരുന്നത്. വാർഷിക വരിസംഖ്യ ഈടാക്കുന്ന കാർഡുകൾ ഓരോ ഇടപാടിനും കൂടുതൽ കിഴിവുകൾ നൽകി മികച്ച ആനുകൂല്യങ്ങൾ നൽകി വരുന്നതായാണ് കാണുന്നത്. കമ്പനി പറയുന്ന അത്രയും തുകയുടെ വാർഷിക ഉപഭോഗമുണ്ടെങ്കിൽ വാർഷിക വരിസംഖ്യ ഈടാക്കുന്ന കാർഡുകൾ എടുക്കുന്നതിൽ മടി കാണിക്കേണ്ടതില്ല. തുടക്കക്കാരെ ആകർഷിക്കുന്നതിനാണ് കാർഡുകൾ LTF ആക്കുന്നത്, അത്തരം കാർഡുകൾക്കു ആനുകൂല്യങ്ങൾ കുറവായിരിക്കും.

ക്രെഡിറ്റ് കാർഡുകൾ എത്ര തരമുണ്ട്?

ഉപയോഗത്തിന്റെ അടിസ്ഥാനത്തിൽ വേണം ക്രെഡിറ്റ് കാർഡുകൾ തിരഞ്ഞെടുക്കേണ്ടത്.

ലൈഫ് സ്റ്റൈൽ കാർഡുകൾ: നിത്യോപയോഗത്തിനുള്ള കാർഡുകളാണ്, ഷോപ്പിംഗ്, വിനോദപാധികൾ, യാത്ര എന്നീ കാര്യങ്ങൾക്ക് ഒരുപോലെ ഉപയോഗിക്കാവുന്നതാണ്.

റിവാർഡ് കാർഡുകൾ: വിവിധ തരത്തിലുള്ള റിവാർഡുകൾ, ക്യാഷ്ബാക്ക് എന്നീ രൂപത്തിൽ പ്രതിഫലം നൽകുന്ന കാർഡുകളാണ്.

ഷോപ്പിംഗ് കാർഡുകൾ: ഓൺലൈൻ, ഓഫ്‌ലൈൻ ഷോപ്പിംഗിനു കൂടുതൽ യോജിച്ച കാർഡുകൾ. ക്യാഷ്ബാക്കും, ഓഫറുകളുമാണ് ഷോപ്പിംഗ് കാർഡുകളുടെ പ്രത്യേകത.

ട്രാവൽ കാർഡുകൾ: യാത്ര ടിക്കറ്റിൽ ഇളവുകൾ, ലോഞ്ച് സൗകര്യം എന്നിവ കൂടുതൽ നൽകുന്ന കാർഡുകൾ. കോ-ബ്രാൻഡ് കാർഡുകൾ: വിവിധ കമ്പനികളുമായി സഹകരിച്ചിറക്കുന്ന കാർഡുകൾ. ഷോപ്പിംഗ് സൈറ്റുകൾ, സേവനങ്ങൾ നൽകുന്ന കമ്പനികളുമായി ചേർന്ന് ഇത്തരം കാർഡുകൾ അവതരിപ്പിക്കാറുണ്ട്. അത്തരം സൈറ്റുകളിൽ നിന്നും സാധനങ്ങൾ വാങ്ങുമ്പോൾ കൂടുതൽ ഇളവുകൾ ലഭിക്കുന്നു. ഉദാ. ഫ്ലിപ്കാർട്ട്-ആക്സിസ് ബാങ്ക് കാർഡ്, ആമസോൺ-ഐസിഐസിഐ കാർഡ്.

ഇന്ധന കാർഡുകൾ: പെട്രോളിയം കമ്പനികളുമായി ചേർന്ന് ബാങ്കുകൾ ചേർന്നിറക്കുന്ന കാർഡുകൾ. ഇന്ധനം (പെട്രോൾ, ഡീസൽ) വാങ്ങുമ്പോൾ ഇളവുകൾ ലഭിക്കും.

ഒന്നിലധികം കാർഡുകൾ എടുക്കുന്നത് അനുവദനീയമാണോ?

ഒന്നിലധികം ക്രെഡിറ്റ് കാർഡുകൾ ഉപയോഗിക്കുന്നത് അനുവദനീയമാണ്. കാർഡുകൾ ഓരോ ആവശ്യങ്ങളെ മുൻനിർത്തി പുറത്തിറക്കുന്നവയാണ്. ഓരോ ആവശ്യങ്ങൾക്കും ഉതകുന്ന വെവ്വേറെ കാർഡുകൾ ഉണ്ടായിരിക്കുന്നത് നല്ലതാണ്. സ്വന്തമായി വാഹനമുള്ളവർക്ക് ഇന്ധന കാർഡ് കൂടി ഉണ്ടായിരിക്കുന്നത് സാമ്പത്തിക ലാഭം നേടിക്കൊടുക്കും. ആക്സിസ് എയ്‌സ്‌ (Axis Ace) കാർഡ് ബില്ലുകൾ ഗൂഗിൾ പേ വഴി അടക്കുമ്പോൾ 5% ഇളവ് നൽകുന്നുണ്ട്. ആമസോൺ വഴി ഷോപ്പിംഗ് കൂടുതൽ നടത്തുന്നവർ ആമസോൺ ഐസിഐസിഐ കാർഡ് ഉപയോഗിക്കുന്നത് കൂടുതൽ പണം ലഭിക്കാൻ സഹായിക്കും. ഓരോ ആവശ്യത്തിനും ഉതകുന്ന കാർഡുകൾ ഉപയോഗിക്കുന്നത് മികച്ച തീരുമാനമായിരിക്കും.

മികച്ച ക്രെഡിറ്റ് കാർഡുകൾ ഏതൊക്കെയാണ്?

മികച്ച കാർഡ് എന്നൊന്നില്ല. ഉപഭോക്താവിന്റെ ആവശ്യത്തിന് ഉതകുന്ന കാർഡ് തിരഞ്ഞെടുക്കുകയാണ് എളുപ്പ മാർഗം. വിവിധ ആവശ്യത്തിനുതകുന്ന കാർഡുകളെ ഇവിടെ പരിചയപ്പെടുത്താം. ലൈഫ് സ്റ്റൈൽ കാർഡുകൾ: Amazon ICICI, Flipkart Axis Bank, Axis Bank Ace Credit Card, Snapdeal Bank of Baroda Credit Card. ക്യാഷ് ബാക്ക് കാർഡുകൾ: SBI Cashback, HDFC Millennia Credit Card.

യാത്ര കാർഡുകൾ: IRCTC SBI Cards, IRCTC BoB Rupay Credit Card, HDFC Regalia Credit Card, ലൈഫ് ടൈം ഫ്രീ കാർഡുകൾ: Amazon ICICI card, HSBC Visa Platinum Credit Card, BoB Premier Credit Card, AU Bank LIT Credit Card, Bank of Baroda Easy Rupay Platinum Card, ICICI Bank Coral Rupay Credit Card, PNB Platinum RuPay Card, ICICI Platinum Chip Credit Card, IndusInd Bank Platinum Aura Edge. ഇന്ധന കാർഡുകൾ: BPCL SBI Card Octane, Indian Oil Citi Platinum Credit Card, IndianOil Axis Bank Credit Card, BPCL SBI Card, HPCL Bank of Baroda ENERGIE Credit Card.

എത്ര ദിവസത്തേക്കാണ് ക്രെഡിറ്റ് കാർഡ് പണം കടം നൽകുന്നത്?

ഒരു മാസത്തെ ഇടപാടുകൾ ആണ് ബിൽ ചെയ്യുന്നത്, ഉദാ. ജനുവരി 1-30 വരെ. ജനുവരി 1 മുതൽ 30 തീയതി വരെ ഒരു ബില്ലിംഗ് സൈക്കിൾ ആണ്. മുപ്പതാം തീയതി ബിൽ തയ്യാറാക്കുന്നു. ബിൽ തയ്യാറായാൽ തുക അടക്കാൻ 20 ദിവസം കൂടി നൽകുന്നു, ഫെബ്രുവരി 20 വരെ. ചുരുക്കം പറഞ്ഞാൽ 50 ദിവസത്തേക്ക് പലിശയില്ലാതെ പണം കടം നൽകുകയാണ് ബാങ്ക് ചെയ്യുന്നത്.

ക്രെഡിറ്റ് കാർഡ് ബിൽ തുക എങ്ങിനെയാണ് അടക്കേണ്ടത്?

ക്രെഡിറ്റ് കാർഡിന്റെ വെബ്‌സൈറ്റിൽ തന്നെ അടക്കാനുള്ള സൗകര്യം ഉണ്ടായിരിക്കും. ബാങ്ക് നൽകുന്ന ക്രെഡിറ്റ് കാർഡ് ആപ്പ് വഴി നേരിട്ട് ബിൽ തുകയടക്കാം. തേർഡ് പാർട്ടി ആപ്പുകളായ, ക്രെഡ് (CRED), പേടിഎം, ആമസോൺ പേ, ഫോൺ പേ തുടങ്ങിയ ആപ്പുകൾ വഴിയും ക്രെഡിറ്റ് കാർഡ് ബിൽ അടക്കാവുന്നതാണ്. തേർഡ് പാർട്ടി ആപ്പുകൾ വഴി ബിൽ അടക്കുമ്പോൾ ക്യാഷ് ബാക്ക് അടക്കമുള്ള ഓഫറുകൾ ലഭിക്കാറുണ്ട്. ഓരോ പേമെന്റ് ആപ്പുകളും ഉപയോഗിക്കുന്ന പേമെന്റ് പ്ലാറ്റുഫോം വ്യത്യാസമുണ്ട്, പണമടച്ചാൽ ബാങ്കിന് ലഭിക്കുന്നത് ഏതാനും ദിവസങ്ങൾക്കു ശേഷമായിരിക്കും (ഉദാ. ഗൂഗിൾ പേ). നാലു ദിവസത്തിന് മുൻപ് എങ്കിലും ബിൽ തുകയടക്കാൻ ശ്രമിക്കുക. ഇന്റർനെറ്റ് ബാങ്കിങ്, യൂപിഐ, ഡെബിറ്റ് കാർഡ്, വാലറ്റുകൾ എന്നീ മാർഗ്ഗങ്ങൾ ഉപയോഗിച്ച് ബിൽ തുക അടക്കാവുന്നതാണ്.

ക്രെഡിറ്റ് കാർഡ് ഉപയോഗിച്ച് കൊണ്ട് ക്രെഡിറ്റ് കാർഡ് ബിൽ അടക്കാൻ പറ്റുമോ?

യൂട്ടിലിറ്റി ബില്ലുകൾ ക്രെഡിറ്റ് കാർഡ് ഉപയോഗിച്ച് അടക്കാമെങ്കിലും, ക്രെഡിറ്റ് കാർഡ് ബിൽ തുകയടക്കാൻ പറ്റില്ല. അത് പോലെ തന്നെ കെഎസ്എഫ്ഇ ചിട്ടി മാസവരി അടക്കാനും ക്രെഡിറ്റ് കാർഡ് ഉപയോഗിച്ച് സാധിക്കില്ല.

ബിൽ തുക അടച്ചില്ലെങ്കിൽ എന്ത് സംഭവിക്കും?

ബിൽ തുകയടച്ചില്ലെങ്കിൽ പിഴത്തുക ചുമത്തും, പലിശ നൽകേണ്ടി വരും, ക്രെഡിറ്റ് ലിമിറ്റ് കുറയും, ക്രെഡിറ്റ് റേറ്റിംഗ് ഏജൻസികളെ ബാങ്ക്ഈ വിവിവരം അറിയിക്കുകയും, ക്രെഡിറ്റ് സ്കോറിനെ സാരമായി ബാധിക്കുകയും ചെയ്യും. അവസാന ശ്രമം എന്ന നിലയിൽ ബാങ്ക് നിയമ നടപടിയിലേക്കു നീങ്ങും. മോശം ക്രെഡിറ്റ് സ്കോർ കാരണം ലോണുകൾ തരാൻ ബാങ്കുകൾ വിസമ്മതിക്കും.

അവസാന തീയതിക്ക് മുൻപേ ബിൽ തുകയടിച്ചില്ലെങ്കിൽ ഉയർന്ന പലിശയാണ് ബാങ്കുകൾ ഈടാക്കുന്നത്, 40% മുതൽ 55% വരെ വാർഷിക പലിശ ഈടാക്കാറുണ്ട്. പേഴ്‌സണൽ ലോണുകൾക്കു പരമാവധി വാർഷിക പലിശ 13% വരെയാണെന്നു ഓർക്കുക. താമസിച്ചു ബിൽ അടച്ചാൽ പിഴ തുക ഈടാക്കുന്നുണ്ട്. ഓരോ ക്രെഡിറ്റ് കാർഡ് ഇനത്തിനും വിവിധ പലിശ നിരക്കാണ് ഈടാക്കുന്നത്. പലിശ നിരക്ക് എത്രയെന്നു ബാങ്ക് വെബ്‌സൈറ്റിൽ നിന്നും അറിയാൻ സാധിക്കും.

ക്രെഡിറ്റ് കാർഡ് ബിൽ അടക്കാൻ കയ്യിൽ പണമില്ല, എന്ത് ചെയ്യും?

ക്രെഡിറ്റ് കാർഡ് ബിൽ അടച്ചില്ലെങ്കിൽ ഉള്ള പ്രത്യാഘാതങ്ങൾ പറഞ്ഞു കഴിഞ്ഞു. ക്രെഡിറ്റ് കാർഡ് കൊണ്ട് തന്നെ പണം കണ്ടെത്താൻ ചില പരിഹാര മാർഗ്ഗങ്ങൾ ഉണ്ട്. തേർഡ് പാർട്ടി ആപ്പുകൾ ക്രെഡിറ്റ് കാർഡ് ഉപയോഗിച്ച് വീട്ടുവാടക അടക്കാനുള്ള സൗകര്യം നൽകുന്നുണ്ട്. അതുപയോഗിച്ചു കൊണ്ട് മറ്റൊരാളിന്റെ അക്കൗണ്ടിലേക്കു പണം കൈമാറാം. കൈമാറുന്ന തുകക്ക് 1% കമ്മീഷൻ നൽകേണ്ടി വരും. മോബി ക്വിക് (Mobikwik)എന്ന ആപ്പ് ക്രെഡിറ്റ് കാർഡ് ഉപയോഗിച്ച് നേരിട്ട് ബിൽ തുക അടക്കാൻ സമ്മതിക്കും. ചെറിയൊരു കമ്മീഷൻ ഈടാക്കുമെന്ന് മാത്രം. പേടിഎം ആപ്പ് ക്രെഡിറ്റ് കാർഡിൽ നിന്നും വാലറ്റിലേക്കു പണം കൈമാറാൻ സാധിക്കും. ക്രെഡിറ്റ് കാർഡ് ബിൽ തുക വാലറ്റിൽ നിന്നും അടക്കാൻ കഴിയും. ഭൂരിഭാഗം ആൾക്കാരും ക്രെഡിറ്റ് കാർഡ് എടുക്കാൻ മടിക്കുന്നതിന്റെ കാരണങ്ങൾ എന്തൊക്കെയാണ്? ക്രെഡിറ്റ് കാർഡ് ഉപയോഗിച്ച് കൂടുതൽ സാധനങ്ങൾ വാങ്ങുകയും, ബിൽ തുക അടക്കാൻ സാധിക്കാതെ വരുമോ എന്ന ഭയമാണ് മിക്കവരേയും പിന്നാക്കം വലിക്കുന്നത്.

ഉപസംഹാരം

ഡിജിറ്റൽ സംവിധാനങ്ങൾ ജീവിതശൈലിയിൽ വളരെയധികം മാറ്റങ്ങൾ വരുത്തിയിട്ടുണ്ട്. ഡിജിറ്റൽ ഇടപാടുകൾ സമയലാഭത്തിനുപരി, സാമ്പത്തിക ലാഭവും നൽകുന്നു. ഇലക്ട്രോണിക് ഇടപാടുകൾക്കും, സേവനങ്ങൾ ഉപയോഗിക്കുന്നതിനും ക്രെഡിറ്റ് കാർഡ് മികച്ച സൗകര്യങ്ങളാണ് നൽകുന്നത്. മത്സരാധിഷ്ഠിതമായ വിപണി ഉപഭോക്താവിന് ധാരാളം നേട്ടങ്ങൾ നൽകുന്നുണ്ട്. നേട്ടങ്ങളെ കൃത്യസമയത്തു ഉപയോഗപ്പെടുത്തുന്നതിന് മികച്ച പണവിനിമയ ഉപാധിയാണ് ക്രെഡിറ്റ് കാർഡ്.

റുപേ ക്രെഡിറ്റ് കാർഡിന്റെ മെച്ചങ്ങൾ

എന്താണ് റുപേ പേയ്‌മെന്റ് നെറ്റ്‌വർക്ക് 

അന്താരാഷ്ട്ര പേയ്‌മെന്റ് നെറ്റുവർക്കുകളായ മാസ്റ്റർ, വിസ എന്നിവക്ക് പകരക്കാരനായി ഭാരത സർക്കാരിനു വേണ്ടി നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ തയ്യാറാക്കിയ സേവനമാണ് റുപേ (RuPay). പണത്തിന്റെ ഇലക്ട്രോണിക് വിനിമയം സാധ്യമാക്കുന്ന സംവിധാനമാണ്  പേയ്‌മെന്റ് നെറ്റുവർക്കുകൾ. ഒരു ഉൽപ്പന്നം വാങ്ങിയ ശേഷം വില ക്രെഡിറ്റ് / ഡെബിറ്റ് കാർഡ് ഉപയോഗിച്ച് POS മെഷീൻ വഴി നൽകുന്നത് മുതൽ വ്യാപാരിയുടെ ബാങ്ക് അക്കൗണ്ടിൽ എത്തുന്നത് വരെയുള്ള പ്രക്രിയകൾ കൈകാര്യം ചെയ്യുന്നത് പേയ്‌മെന്റ് നെറ്റുവർക്കാണ്. കാർഡ്, മെഷീനുകൾ, നെറ്റ്‌വർക്ക്, പണം കൈമാറുന്നതിന്റെ മാനദണ്ഡങ്ങൾ, നടപടിക്രമങ്ങൾ, സാങ്കേതികവിദ്യകൾ തുടങ്ങിയ കാര്യങ്ങൾ ചേർന്നതാണ് പേയ്‌മെന്റ് നെറ്റുവർക്ക്. വിസ, മാസ്റ്റർ, എന്നീ അന്താരാഷ്ട്ര പേയ്‌മെന്റ് നെറ്റുവർക്ക് സേവനങ്ങളാണ് ഇന്ത്യയിൽ അടുത്ത കാലം വരെ പ്രചാരത്തിൽ ഉണ്ടായിരുന്നത്. ഓരോ ഇടപാടിനും വ്യാപാരിയും, ഉപഭോക്താവും നൽകേണ്ട സേവന നിരക്കുകൾ ഉയർന്നതായിരിന്നു. 

റൂപേ ക്രെഡിറ്റ് കാർഡുകളുടെ മെച്ചങ്ങൾ

തദ്ദേശീയമായ പേയ്‌മെന്റ് നെറ്റുവർക്ക് എന്ന ആശയമാണ്  റുപേയിലൂടെ നിലവിൽ വന്നത്. 26 മാർച്ച് 2012 ലാണ് റൂപേ നിലവിൽ വന്നത്. റിസർവ് ബാങ്ക് ഓഫ് ഇന്ത്യയുടെ കണക്കു പ്രകാരം ഡെബിറ്റ്-ക്രെഡിറ്റ് കാർഡുകളിൽ 60% വിപണി വിഹിതം റുപേക്കുണ്ട്. എന്ത് കൊണ്ട് റുപേ ക്രെഡിറ്റ് കാർഡുകൾ ആകർഷകമാകുന്നു എന്നത് കൂടി പരിശോധിക്കാം. റുപേ കാർഡുകളുടെ ഉപയോഗം പ്രോത്സാഹിപ്പിക്കുന്നതിനുള്ള വിവിധ നടപടികൾ ഭാരത സർക്കാർ കൈക്കൊണ്ടിട്ടുണ്ട്. ഇടപാട് മൂല്യത്തിന്റെ 1-3% വരെ മർച്ചന്റ് ഡിസ്‌കൗണ്ട് നിരക്ക് (MDR) വ്യാപാരികളിൽ നിന്നും ബാങ്കുകൾ ഈടാക്കിയിരുന്നു. ഒരു വ്യാപാരിക്ക് ക്രെഡിറ്റ്, ഡെബിറ്റ് കാർഡുകൾ മുഖേന ഉപഭോക്താക്കളിൽ നിന്ന് പേയ്‌മെന്റുകൾ സ്വീകരിക്കുന്നതിന് അവരുടെ ഇഷ്യു ചെയ്യുന്ന ബാങ്ക് ഈടാക്കുന്ന ഒരു ഫീസാണ് മർച്ചന്റ് ഡിസ്‌കൗണ്ട് നിരക്ക്. ഈ നിരക്ക് ഉള്ളതിനാൽ വ്യാപാരികൾ ക്രെഡിറ്റ് കാർഡുകൾ വഴി ഇടപാടുകൾ നടത്താൻ വിമുഖത കാണിക്കുന്നുണ്ട്. 2000 രൂപ വരെയുള്ള റുപേ കാർഡ് വഴിയുള്ള ഇടപാടുകളെ മർച്ചന്റ് ഡിസ്‌കൗണ്ട് നിരക്കിൽ നിന്നും ഒഴിവാക്കിയിട്ടുണ്ട്. 

റൂപേ ക്രെഡിറ്റ് കാർഡുകളെ യൂപിഐ ആപ്പുമായി ചേർത്ത് ഇടപാടുകൾ നടത്താൻ സാധിക്കും. QR Code സ്‌കാൻ ചെയ്തു കൊണ്ട് ക്രെഡിറ്റ് കാർഡിൽ നിന്നും പണം കൈമാറാൻ സാധിക്കും. നിലവിൽ ഭീം (BHIM)  ആപ്പ് വഴി മാത്രമാണ് റൂപേ ക്രെഡിറ്റ് കാർഡുകളെ ലിങ്ക് ചെയ്യാൻ പറ്റുന്നത്.  ഇത്തരം ഓരോ ഇടപാടിനും 10% ക്യാഷ്ബാക്ക് ഉപഭോക്താവിന് ലഭിക്കും. HDFC, Indian Bank, Punjab National Bank, Union Bank എന്നിവരുടെ ക്രെഡിറ്റ് കാർഡുകളാണ് ഭീം ആപ്പിൽ ചേർക്കാൻ സാധിക്കുന്നത്. ഭാവിയിൽ കൂടുതൽ ബാങ്കുകളുടെ റൂപേ ക്രെഡിറ്റ് കാർഡുകൾ ചേർക്കാൻ സാധിക്കുമെന്ന് പ്രതീക്ഷിക്കാം. 

റൂപേ ക്രെഡിറ്റ് കാർഡുകൾ എങ്ങിനെ ലഭിക്കും?

പൊതുമേഖലയിലും, സ്വകാര്യ മേഖലയിലുമുള്ള ബാങ്കുകൾ റൂപേ ക്രെഡിറ്റ് കാർഡുകൾ പുറത്തിറക്കിയിട്ടുണ്ട്. ബാങ്കുകളുടെ വെബ്സൈറ്റ് വഴിയോ, നേരിട്ട് ബാങ്ക് സന്ദർശിച്ചോ റൂപേ ക്രെഡിറ്റ് കാർഡിനുള്ള അപേക്ഷ നൽകാവുന്നതാണ്. സാധാരണ ക്രെഡിറ്റ് കാർഡുകൾ ലഭിക്കാൻ അപേക്ഷിക്കുമ്പോൾ സമർപ്പിക്കേണ്ട രേഖകൾ (ആധാർ, പാൻ കാർഡ്, മേൽവിലാസം തെളിയിക്കുന്ന രേഖ, സാലറി സ്ലിപ്, ആദായനികുതി അടച്ചതിന്റെ രേഖകൾ) റൂപേ ക്രെഡിറ്റ് കാർഡിന്റെ അപേക്ഷയോടൊപ്പം നൽകണം. ആവശ്യപ്പെടുന്ന രേഖകൾ വിവിധ ബാങ്കുകൾക്കു വ്യത്യസ്തമാവാം.  അപേക്ഷ പരിശോധിച്ച ശേഷം യോഗ്യമെങ്കിൽ കാർഡുകൾ അനുവദിക്കുന്നു. ചില ബാങ്കുകൾ കാർഡ് അനുവദിക്കുന്നതിൽ ഉദാര മനോഭാവം കാണിക്കാറുണ്ട്, അപേക്ഷയിൽ തീരുമാനം എടുക്കുന്നതിൽ കാർക്കശ്യം കാണിക്കുന്ന ബാങ്കുകളുമുണ്ട്. അപേക്ഷ നൽകുന്ന ബാങ്കിൽ അക്കൗണ്ട് ഉണ്ടെങ്കിൽ കാർഡ് ലഭിക്കാനുള്ള സാധ്യത കൂടുതലാണ്.

പ്രമുഖ റൂപേ ക്രെഡിറ്റ് കാർഡുകൾ

പ്രമുഖ റൂപേ ക്രെഡിറ്റ് കാർഡുകളെ ഇവിടെ പരിചയപ്പെടുത്തുന്നു. വാർഷിക ഫീസിന്റെ കാര്യങ്ങൾ മാത്രമേ ഇവിടെ കൊടുത്തിട്ടുള്ളൂ. കാർഡിനെപ്പറ്റിയുള്ള കൂടുതൽ വിവരങ്ങൾ അതത് ബാങ്കിന്റെ വെബ്‌സൈറ്റിൽ നിന്നും പരിശോധിക്കാവുന്നതാണ്.

ഭീം ആപ്പിൽ ചേർക്കാൻ പറ്റുന്ന കാർഡുകൾ ഇവയാണ്.

PNB Platinum RuPay Card: നാല് മാസത്തിൽ ഒരിക്കലെങ്കിലും ഉപയോഗിക്കുകയാണെങ്കിൽ ഫീസ് ഈടാക്കുന്നതല്ല.

PNB Select Credit Card: 500 രൂപ ചേരുമ്പോൾ അടക്കണം. നാല് മാസത്തിൽ ഒരിക്കലെങ്കിലും ഉപയോഗിക്കുകയാണെങ്കിൽ ഫീസ് ഈടാക്കുന്നതല്ല. 

Union Platinum RuPay Card: 299 രൂപ വാർഷിക ഫീസ് ഉണ്ട്.

Union Select RuPay Card: 499 രൂപ വാർഷിക ഫീസ് ഉണ്ട്. 

Indian Bank RuPay Cards: മൂന്ന് റൂപേ ക്രെഡിറ്റ് കാർഡുകൾ ഇന്ത്യൻ ബാങ്കിനുണ്ട്.  

HDFC Bharat Credit Card: വാർഷിക ഫീസ് 500 രൂപയാണ്. 

IndianOil HDFC Bank Credit Card: ഇന്ധനം വാങ്ങുമ്പോൾ ഇളവ് ലഭിക്കുന്ന കാർഡ്.

മറ്റു ബാങ്കുകളുടെ റൂപേ ക്രെഡിറ്റ് കാർഡുകൾ

ICICI Coral RuPay Credit Card: മികച്ച ആനുകൂല്യങ്ങൾ നൽകുന്ന ഐസിഐസിഐ ബാങ്കിന്റെ റൂപേ കാർഡാണിത്.

Federal Bank Rupay Signet Credit Card: മലയാളികൾക്ക് പ്രിയപ്പെട്ടതാണ് ഫെഡറൽ ബാങ്ക്. 

BOB Snapdeal RuPay card: 249 രൂപ മാത്രം വാർഷിക ഫീസുള്ള, ക്യാഷ്ബാക്ക് തരുന്ന കാർഡ് ആണ്. അപേക്ഷിച്ചാൽ വേഗം അനുവദിക്കുന്ന കാർഡാണിത്. ക്രെഡിറ്റ് കാർഡ് അപേക്ഷ വിവിധ ബാങ്കുകളിൽ നൽകി പരാജയപ്പെട്ടവർക്കു ഈ കാർഡിന് അപേക്ഷിക്കാം. 

Bank of Baroda Easy, Bank of Baroda Premier എന്നിവ വാർഷിക ഫീസ് ഇല്ലാത്ത തുടക്കക്കാർക്ക് പറ്റിയ റൂപേ ക്രെഡിറ്റ് കാർഡുകളാണ്.    

IRCTC SBI RuPay Credit Card: IRCTC വഴി റെയിൽവേ ടിക്കറ്റ് എടുക്കുമ്പോൾ ഇളവുകൾ ലഭിക്കുന്ന കാർഡ്.

ഉപസംഹാരം

കൂടുതൽ റൂപേ ക്രെഡിറ്റ് കാർഡുകൾ UPI യുമായി ലിങ്ക് ചെയ്യപ്പെടുമെന്നു പ്രതീക്ഷിക്കാം. വിവിധ മാനദണ്ഡങ്ങൾ കണക്കിലെടുത്താണ് ബാങ്കുകൾ ക്രെഡിറ്റ് കാർഡുകൾ അനുവദിക്കുന്നത്. മികച്ച ക്രെഡിറ്റ് സ്കോർ ഉണ്ടായിരുന്നാലും അപേക്ഷകന് കാർഡുകൾ അനുവദിക്കണമെന്ന് നിർബന്ധമില്ല. HDFC ബാങ്ക് ക്രെഡിറ്റ് കാർഡ് അപേക്ഷയിൽ തീരുമാനം എടുക്കുന്നതിൽ കാർക്കശ്യം കാണിക്കുന്ന ബാങ്കാണ്. ബാങ്ക് ഓഫ് ബറോഡ ഉദാരമായ സമീപനമാണ് ക്രെഡിറ്റ് കാർഡ് അപേക്ഷയിൽ എടുക്കുന്നത്. ഓരോ അപേക്ഷകനും ബാങ്കുകളിൽ നിന്നും വ്യത്യസ്ത അനുഭവങ്ങളാണ് ക്രെഡിറ്റ് കാർഡിനു അപേക്ഷിക്കുമ്പോൾ ലഭിക്കുന്നത്.  

റഫറൻസ് 

RuPay credit card on UPI

https://www.rupay.co.in/rupay-credit-card-on-upi

RuPay credit card range

https://www.rupay.co.in/our-cards/rupay-credit/explore-the-credit-card-range

No charges on RuPay credit card use for transactions up to Rs 2,000

https://www.businesstoday.in/latest/economy/story/no-charges-on-rupay-credit-card-use-for-transactions-up-to-rs-2000-349081-2022-10-05

വീട്ടിൽ സെക്യൂരിറ്റി ക്യാമറ സ്ഥാപിക്കാം

വീട് നിരീക്ഷണ വിധേയമാക്കാനും, സുരക്ഷിതമാക്കാനും സെക്യൂരിറ്റി ക്യാമറ ഉപയോഗിക്കുന്നത് കൂടി വരികയാണ്. വീട് പണിയാൻ പോകുന്നവർക്കും, പണി കഴിഞ്ഞവർക്കും സെക്യൂരിറ്റി ക്യാമറ സ്ഥാപിക്കാനാവും. ഒരു വിദഗ്ദന്റെ സഹായത്തോടെയും, അല്ലാതെയും സെക്യൂരിറ്റി ക്യാമറ സ്ഥാപിക്കുന്നതിന്  സാധിക്കും. എന്നിരുന്നാലും സെക്യൂരിറ്റി ക്യാമറ സംവിധാനത്തെക്കുറിച്ചു ധാരണ ഉണ്ടാക്കിയെടുക്കേണ്ടത് ആവശ്യമാണ്. ഒരു സെക്യൂരിറ്റി ക്യാമറ സംവിധാനത്തിൽ താഴെ പറയുന്ന ഘടകങ്ങൾ ഉണ്ടായിരിക്കും.

ക്യാമറ: രണ്ടു തരത്തിലുള്ള ക്യാമറകൾ ഉണ്ട്; അനലോഗ്, ഐപി ക്യാമറകൾ. ദൃശ്യങ്ങളെ അനലോഗ് സിഗ്നൽ ആയി ശേഖരിക്കുന്ന ക്യാമറയാണ് അനലോഗ് ക്യാമറ. അനലോഗ് സിഗ്നലുകളെ ഡിജിറ്റൽ രൂപത്തിൽ മാറ്റിയാണ് ശേഖരിക്കുന്നത്. ദൃശ്യങ്ങളെ നേരിട്ട് ഡിജിറ്റൽ രൂപത്തിൽ ശേഖരിക്കുന്നവയാണ് ഐപി ക്യാമറകൾ. 

Dome camera

ബുള്ളറ്റ്, ഡോം ക്യാമറ എന്നിങ്ങനെ ഉപയോഗത്തിനനുസൃതമായി ക്യാമറകളെ വീണ്ടും രണ്ടായി തിരിക്കാം. ഡോം ക്യാമറകൾ വീടിനകത്തു ഉപയോഗിക്കാൻ യോജിച്ചതാണ്. ഒരു മുറിയുടെ 360° കാഴ്ച നൽകാനും കഴിയും. 

Bullet camera

ബുള്ളറ്റ് ക്യാമറകൾക്ക് കാഴ്ച പരിധി കൂടുതലുണ്ട്. വീടിന്റെ പുറം ഭാഗങ്ങൾ, വലിയ വീട്ടുമുറ്റം, പാർക്കിംഗ് സ്ഥലങ്ങൾ, ഇടുങ്ങിയ പാതകൾ തുടങ്ങിയ സ്ഥലങ്ങളിൽ സ്ഥാപിക്കാൻ മികച്ചതാണ്. ക്യാമറകളുടെ ദൂര പരിധി കൂടി പരിഗണിച്ചു വേണം തിരഞ്ഞെടുക്കാൻ, 15, 20, 25, 30 മീറ്റർ ദൂര പരിധിയുള്ള ക്യാമറകൾ ലഭ്യമാണ്. ക്യാമറകൾ പുറത്തു ഉപയോഗിക്കാനോ, അകത്തു ഉപയോഗിക്കാനോ യോജിച്ചത് എന്ന് കൃത്യമായി പറഞ്ഞിരിക്കും. വീട്ടിനകത്തു ഉപയോഗിക്കാനുള്ള ക്യാമറ പുറത്തുപയോഗിക്കാൻ പാടില്ല. ചൂട്, പൊടി തുടങ്ങിയ താങ്ങാനുള്ള ശേഷി അവക്കുണ്ടായിരിക്കില്ല. 

നിരീക്ഷണ സംവിധാനം: ക്യാമറകളിലെ ദൃശ്യങ്ങൾ തത്സമയം കാണുന്നതിനും, റെക്കോർഡ് ചെയ്തത് കാണുന്നതിനും മോണിറ്റർ സ്ക്രീൻ ഉപയോഗിക്കുന്നു. മൊബൈൽ ആപ്പുകൾ വഴിയും ദൃശ്യങ്ങൾ കാണാൻ പറ്റും. 

വയറിങ്: ക്യാമറയും, റെക്കോർഡിങ് സംവിധാനത്തേയും ബന്ധിപ്പിക്കുന്നതിനാണ് വയറിങ് ഉപയോഗിക്കുന്നത്. വിവിധ തരത്തിലുള്ള വയറുകൾ ഉപയോഗിക്കുന്നുണ്ട്. CAT 6 കേബിൾ ആണ് അനലോഗ്, ഐപി ക്യാമറകൾക്കായി ഉപയോഗിക്കുന്നത്. PoE IP (Power over Ethernet) സവിശേഷതയുള്ള കേബിൾ ആണ്; ക്യാമറക്കു പ്രവർത്തിക്കാനുള്ള ഊർജ്ജം നൽകാനും, ചെയ്യാനും പ്രക്ഷേപണം ചെയ്യാനും ഒരു കേബിൾ മാത്രമേ ആവശ്യമുള്ളൂ. വീട് പണി നടക്കുമ്പോൾ തന്നെ സെക്യൂരിറ്റി ക്യാമറക്കുള്ള വയറിങ് കൂടി നടത്തുന്നത് സൗകര്യപ്രദമാണ്.

വയർലെസ്സ് ഇന്റർനെറ്റ് പ്രചാരത്തിലായതോടെ കേബിൾ വഴി സെക്യൂരിറ്റി ക്യാമറകളെ കേബിൾ വഴി ബന്ധിപ്പിക്കുന്ന രീതി കുറഞ്ഞു വരികയാണ്. വൈ ഫൈ സെക്യൂരിറ്റി സംവിധാനം പ്രചാരത്തിലായിട്ടുണ്ട്. സെക്യൂരിറ്റി ക്യാമറ വയറിങ് നടത്തിയിട്ടില്ലാത്ത വീടുകൾക്ക് വൈ ഫൈ സംവിധാനത്തിൽ പ്രവർത്തിക്കുന്ന ക്യാമറകൾ ഉപയോഗിക്കാം.

വീഡിയോ റെക്കോർഡർ: ക്യാമറകൾ ശേഖരിക്കുന്ന വീഡിയോ റെക്കോർഡ് ചെയ്യുന്ന സംവിധാനമാണ്. ഡിജിറ്റൽ വീഡിയോ റെക്കോർഡർ (DVR), നെറ്റ്‌വർക്ക് വീഡിയോ റെക്കോർഡർ (NVR) എന്നിങ്ങനെ രണ്ടു തരത്തിലുള്ള സംവിധാനങ്ങൾ പ്രചാരത്തിലുണ്ട്. അനലോഗ് ക്യാമറ ശേഖരിക്കുന്ന വീഡിയോയെ ഡിജിറ്റൽ രൂപത്തിൽ മാറ്റം വരുത്തി ശേഖരിക്കുന്ന പ്രവർത്തിയാണ് DVR ചെയ്യുന്നത്. ഐപി ക്യാമറ റെക്കോർഡ് ചെയ്യുന്ന ഡിജിറ്റൽ വീഡിയോ നേരിട്ട് ശേഖരിക്കുകയാണ് NVR ചെയ്യുന്നത്.

Image courtesy: blog.swann.com

നേരിട്ട് ഡിജിറ്റൽ രൂപത്തിൽ റെക്കോർഡ് ചെയ്യുന്നതിനാൽ വീഡിയോ ക്വാളിറ്റി മികച്ചത് NVR സംവിധാനത്തിലാണ്. NVR സംവിധാനത്തിൽ പ്രവർത്തിക്കുന്ന സെക്യൂരിറ്റി സംവിധാനത്തിന് DVR നേക്കാൾ അൽപ്പം ചിലവ് കൂടുതലാണ്. NVR വേണോ, DVR വേണോ എന്നത് തീരുമാനിക്കേണ്ടത് വീട്ടുടമ ആണ്.     

ശേഖരണ സംവിധാനം: വീഡിയോ ശേഖരിക്കുന്നത് NVR, DVR സംവിധാനത്തിനുള്ളിലെ ഡിജിറ്റൽ സംഭരണിയിലേക്കാണ്. കമ്പ്യൂട്ടറിൽ ഉപയോഗിക്കുന്ന തരം സ്റ്റോറേജ് ആണ് ഇവിടേയും ഉപയോഗിക്കുന്നത്. എത്ര ദിവസത്തേക്കുള്ള വീഡിയോ സൂക്ഷിക്കണം എന്നതിനെ അടിസ്ഥാനപ്പെടുത്തി വേണ്ടം സ്റ്റോറേജ് വലുപ്പം (e.g. 1 TB, 2 TB) തിരഞ്ഞെടുക്കേണ്ടത്.

ഏങ്ങിനെ തിരഞ്ഞെടുക്കണം

ഇനി നമുക്ക് കാര്യത്തിലേക്കു കടക്കാം. വീട് പണി അവസാന ഘട്ടത്തിൽ എത്തുമ്പോൾ കരുതിയിരുന്ന കാശ് തീർന്ന അവസ്ഥയിലാവും എല്ലാവരും. സെക്യൂരിറ്റി ക്യാമറ സംവിധാനങ്ങളുടെ വില ഒന്ന് പരിശോധിക്കാം. എത്ര ക്യാമറകൾ സ്ഥാപിക്കണം എന്നതിനെ അടിസ്ഥാനപ്പെടുത്തിയാണ് ചിലവ് കണക്കു കൂട്ടുക. ചെറിയ പരിസരമാണ് നിരീക്ഷണ വിധേയമാക്കേണ്ടതെങ്കിൽ വീടിന്റെ മുൻഭാഗത്തും, പിൻഭാഗത്തും തൽക്കാലം രണ്ടു ക്യാമറകൾ മതിയാവും. സ്ഥലത്തിന്റെ കിടപ്പ്, ആകൃതി എന്നിവയൊക്കെ ക്യാമറ സ്ഥാപിക്കുമ്പോൾ പരിഗണിക്കേണ്ടതാണ്. എത്ര ക്യാമറ വേണം എന്നതിനെ പരിഗണിച്ചു വേണം വീഡിയോ റെക്കോർഡർ (DVR/NVR) തിരഞ്ഞെടുക്കേണ്ടത്. നാല് ക്യമറകൾ ആവശ്യമുണ്ടെങ്കിൽ, അത്രയും ക്യാമറകൾ ഘടിപ്പിക്കാനുള്ള സൗകര്യം DVR/NVRൽ ഉണ്ടായിരിക്കണം.

4 ചാനൽ DVR 

ഭാവിയിൽ കൂടുതൽ ക്യമറകൾ ഘടിപ്പിക്കേണ്ടത് മുൻകൂട്ടി കണ്ട്  അതനുസരിച്ചുള്ള സ്ലോട്ടുകൾ ഉള്ള DVR/NVR വാങ്ങുക. എത്ര resolution (ഉദാ. 2 MP, 5MP) ഉള്ള ക്യാമറകൾ സപ്പോർട്ട് ചെയ്യും എന്ന് കൂടി പരിശോധിക്കേണ്ടതാണ്. DVR അധിഷ്ഠിത സെക്യൂരിറ്റി സംവിധാനങ്ങളിൽ ദൃശ്യങ്ങൾക്ക് വ്യക്തത വേണമെങ്കിൽ 5 MP (Mega Pixel) ക്യാമറ വേണ്ടി വരും. NVR സംവിധാനത്തിൽ നേരിട്ട് ഡിജിറ്റൽ രൂപത്തിൽ റെക്കോർഡ് ചെയ്യുന്നതിനാൽ 2 MP ക്യാമറയിൽ പോലും മികച്ച ദൃശ്യങ്ങൾ ലഭിക്കും.   CP PLUS, Hikvision, Dahua തുടങ്ങിയ കമ്പനികളാണ് ഈ രംഗത്തെ പ്രമുഖർ. 

DVR/NVR സംവിധാനങ്ങൾ സ്ഥാപിക്കുന്നതിന് സാങ്കേതിക വൈദഗ്ധ്യം ആവശ്യമുള്ള ജോലിയാണ്. നിങ്ങളുടെ സ്ഥലത്തുള്ള സേവന ദാതാക്കളെ കണ്ടു ക്വട്ടേഷൻ വാങ്ങാവുന്നതാണ്. DVR/NVR റെക്കോർഡർ, ക്യാമറ, അനുബന്ധ സാധനങ്ങളുടെ വില ആമസോൺ, ഫ്ലിപ്കാർട്ട് വെബ്സൈറ്റുകളിൽ നോക്കി താരതമ്യം ചെയ്യാവുന്നതാണ്. സാമഗ്രികൾ സെറ്റ് ആയിട്ടും, വെവ്വേറെയും വാങ്ങാൻ സാധിക്കും. DVR/NVR, ക്യാമറകൾ, ഹാർഡ് ഡിസ്‌ക്, കേബിളുകൾ തുടങ്ങിയവ കോംബോ ബോക്സിൽ ഉണ്ടാവും. ഉദാഹരമായി CP PLUS കമ്പനിയുടെ നാല് ക്യാമറ ഉള്ള DVR/NVR കിറ്റ് ആണ് വേണ്ടതെങ്കിൽ ആമസോണിൽ ഈ പറയുന്ന വാക്കുകൾ ഉപയോഗിച്ച് തിരച്ചിൽ നടത്തുക, cp plus dvr 4 channel kit. ക്യാമറയുടെ പ്രത്യേകത അനുസരിച്ചു കിറ്റിന്റെ വിലയിലും വ്യത്യാസം ഉണ്ടാവും. അതിലെ ഓരോ ഘടകത്തിന്റെയും സ്പെസിഫിക്കേഷൻ കൂടി പരിശോധിക്കുക, വിലക്കുറവ് മാത്രം നോക്കരുത്.   കയ്യിൽ കാശ് കുറവാണെങ്കിൽ സാങ്കേതിക വിദഗ്ധന്റെ സഹായത്തോടെ സാമഗ്രികൾ ഓൺലൈൻ ആയി EMI രീതിയിൽ വാങ്ങാവുന്നതാണ്. നിങ്ങൾ സാങ്കേതിക കൗതുകം ഉള്ളയാളാണെങ്കിൽ  DVR/NVR വാങ്ങി യൂട്യൂബ് വീഡിയോ നോക്കി സ്വയം പഠിച്ചു സ്ഥാപിക്കാവുന്നതാണ്.

വൈഫൈ സ്മാർട്ട് ക്യാമറ

DVR/NVR ഘട്ടങ്ങൾ ഒന്നും തന്നെയില്ലാതെ പ്രവർത്തിക്കാൻ സാധിക്കുന്ന ഒറ്റയാന്മാരാണ് വൈഫൈ സ്മാർട്ട് ക്യാമറകൾ. വയറിങ്, മറ്റു അനുബന്ധ സാമഗ്രികൾ ഒന്നും തന്നെ വേണ്ടതില്ല. വീഡിയോ റെക്കോർഡ് ചെയ്‌തു ക്യാമറക്കുള്ളിലെ മെമ്മറി കാർഡിലേക്ക് (മൊബൈൽ ഫോണിൽ ഇടുന്ന അതേ കാർഡ്) ശേഖരിക്കുന്നു. വൈഫൈ ഇന്റർനെറ്റ് ഉണ്ടെങ്കിൽ വളരെ നല്ലത്. ക്‌ളൗഡ്‌ സ്റ്റോറേജിലേക്കും വീഡിയോ റെക്കോർഡ് ചെയ്‌തു സൂക്ഷിക്കാൻ പറ്റും. കള്ളൻ ക്യാമറാ മോഷ്ടിച്ചോണ്ടു പോയാലും ദൃശ്യം നഷ്ടപ്പെടില്ല. മൊബൈൽ ആപ്പ് വഴി തത്സമയം നിരീക്ഷിക്കാം. വീടിന്റെ പരിസരത്തു ആരെങ്കിലും പ്രവേശിച്ചാൽ അറിയിപ്പ് തരും. പുറത്തു നിൽക്കുന്നവരുമായി പരസ്പരം സംസാരിക്കാനും സാധിക്കും. ഈ പറഞ്ഞ സൗകര്യങ്ങൾ എല്ലാം തന്നെ DVR/NVR സംവിധാനത്തിലും ഉണ്ട്. ചുരുങ്ങിയ ചിലവിൽ സെക്യൂരിറ്റി സംവിധാനം ഒരുക്കാം എന്നതാണ് വൈഫൈ സ്മാർട്ട് ക്യാമറയുടെ സവിശേഷത. 

Mi ബ്രാൻഡിന്റെ വൈഫൈ ക്യാമറകൾ വിലക്കുറവും, മികച്ച ഗുണനിലവാരവും പുലർത്തുന്നവയാണ്. മെമ്മറി കാർഡും, ക്‌ളൗഡ്‌ സ്റ്റോറേജുമുള്ള മോഡൽ തിരഞ്ഞെടുക്കുന്നതാണ് നല്ലത്. ക്യാമറ സ്ഥാപിക്കാൻ ഉദ്ദേശിക്കുന്നയിടത്തു നിന്നും മികച്ച രീതിയിൽ ദൃശ്യങ്ങൾ കിട്ടുമെന്ന് ഉറപ്പു വരുത്തുക, ക്യാമറ പ്രവർത്തിക്കാൻ പവർ പ്ലഗ്ഗും വേണ്ടി വരും. വയറിങ് സമയത്തു തന്നെ വൈഫൈ ക്യാമറകൾക്ക് വേണ്ട പവർ പ്ലഗ്ഗുകൾ സ്ഥാപിക്കാൻ ശ്രദ്ധിക്കണം. പുറത്തുള്ള ക്യാമറയുടെ വയർ അകത്തേക്കെടുക്കാൻ ഭിത്തി തുളച്ചു പൈപ്പ് ഇട്ടാൽ പ്ലഗ്ഗും, സ്വിച്ചും അകത്തു തന്നെ സ്ഥാപിക്കാം. ക്യാമറ ഭിത്തിയിൽ സ്ഥാപിക്കാനുള്ള സ്റ്റാൻഡ് വാങ്ങാൻ ലഭിക്കും. സ്റ്റാൻഡിൽ ക്യാമറ ഉറപ്പിക്കുന്നതാണ് മികച്ച ദൃശ്യങ്ങൾ ലഭിക്കാൻ നല്ലത്.

ഭിത്തിയിൽ സ്ഥാപിക്കുന്ന ക്യാമറ സ്റ്റാൻഡ്.

ആമസോണിലും, ഫ്ലിപ്കാർട്ടിലും ഓഫറുകൾ ഉള്ള സമയത്തു വൈഫൈ സ്മാർട്ട് ക്യാമറകളുടെ വില കുറഞ്ഞു വാങ്ങാൻ സാധിക്കും.  

ഉപസംഹാരം 

വീടിന്റെ വലുപ്പം, ആകൃതി, വീഡിയോ ഗുണമേന്മ, മുടക്കാനാവുന്ന തുക എന്നീ കാര്യങ്ങൾ പരിഗണിച്ചു വേണം സെക്യൂരിറ്റി ക്യാമറകൾ തിരഞ്ഞെടുത്തക്കാനും, വാങ്ങിക്കാനും. വീട് പണിയുന്നതിന് മുൻപ് കേബിളുകൾ വലിക്കൽ, പവർ നൽകാനുള്ള പ്ലഗുകൾ സ്ഥാപിക്കൽ എന്നിവ ചെയ്യുന്നത് അനാവശ്യമായ ചിലവുകൾ ഒഴിവാക്കാൻ സഹായിക്കും. DVR സംവിധാനത്തേക്കാൾ മികച്ചതാണ് NVR സാങ്കേതികവിദ്യ. വൈഫൈ സ്മാർട്ട്ക്യാ മറകൾ മറ്റു സംവിധാനങ്ങളെക്കാൾ സാങ്കേതികമായി വളരെ മുന്നിലാണ്. നല്ല രീതിയിൽ ഹോം വർക്ക് ചെയ്‌ത ശേഷം സെക്യൂരിറ്റി ക്യാമറ വെക്കുന്നതിൽ തീരുമാനമെടുക്കുക.

പ്രയോജനപ്രദമായ ലിങ്കുകൾ

Xiaomi Home Security Camera 2i 

CP Plus Store on Amazon

HIK Vision Store on Amazon

YouTube Videos

സ്മാർട്ട് ഹോം ഒരുക്കാം

Image courtesy: Mohamed Hasan
https://pxhere.com/en/photo/1586047

വീടിനെ സ്മാർട്ട് ഹോം ആക്കണമെങ്കിൽ വലിയ ചിലവ് വരുമെന്നാണ് പൊതുവെയുള്ള ധാരണ. വിലകൂടിയ ഉപകരണങ്ങൾ വാങ്ങി ഘടിപ്പിക്കേണ്ടി വരുമെന്നാണ് എല്ലാവരും കരുതുന്നത്. വീട് സ്മാർട്ടാക്കാൻ വലിയ ചിലവില്ല എന്നതാണ് യാഥാർഥ്യം. ഏതാനും ദിവസത്തെ പരീക്ഷണ നിരീക്ഷണങ്ങൾക്ക് ശേഷം സ്മാർട്ട് ഹോമിനെക്കുറിച്ചുള്ള എന്റെ അനുഭവവും, അഭിപ്രായങ്ങളും നിങ്ങൾക്കായി പങ്കുവെക്കുന്നു.

 

എന്താണ് സ്മാർട്ട് ഹോം?

വീട്ടിലെ ഉപകരണങ്ങൾ സ്മാർട്ട് ആകുമ്പോളാണ് വീടും മിടുക്കൻ/മിടുക്കത്തി ആകുന്നത്. ഒരു ഉദാഹരണം പറഞ്ഞാൽ, പത്തു മുട്ട വാങ്ങി ഫ്രിഡ്ജിൽ സൂക്ഷിച്ചിരിന്നു, ഉപയോഗ ശേഷം, മുട്ടകളുടെ എണ്ണം മൂന്നെണ്ണമായി കുറഞ്ഞിരിക്കുന്നു. മുട്ടകളുടെ എണ്ണം കുറഞ്ഞിരിക്കുന്നു, വാങ്ങി വെക്കണം എന്ന വിവരം ഫോണിൽ അറിയിപ്പായി കിട്ടുകയാണെങ്കിൽ ജോലി കഴിഞ്ഞു വീട്ടിലേക്കു പോകുന്ന വഴി മുട്ട വാങ്ങിക്കൊണ്ടു പോയി സ്റ്റോക്ക് ചെയ്യാം. മുട്ടയുടെ എണ്ണം എടുത്തു ഫോൺ ആപ്പ് വഴി അറിയിക്കാൻ ഒരു സംവിധാനം ഉണ്ടെങ്കിൽ ഫ്രിഡ്ജ് സ്മാർട്ട് ആയി എന്ന് പറയാൻ പറ്റും. വീട്ടിൽ ചെന്ന ശേഷം മുട്ട വാങ്ങണമെന്ന് ഫ്രിഡ്ജ് തുറന്ന ശേഷം അറിയുന്നത് കഷ്ടമാണ്. വണ്ടി എടുത്ത് കടയിൽ പോകേണ്ടി വരും, സമയ നഷ്ടം, ഇന്ധന നഷ്ടം ഫലം.

ഇന്റർനെറ്റ് ഓഫ് തിങ്ങ്സ് (Internet of Things) എന്ന സംവിധാനമാണ് സ്മാർട്ട് ഹോം ആകാൻ സഹായിക്കുന്നത്. IoT എന്ന ചുരുക്കപ്പേരിൽ ഇതറിയപ്പെടുന്നു. ഒരു നെറ്റ്‌വർക്കിന്റെ ഭാഗമായ ഉപകരണങ്ങൾ എന്നാണ് ഇന്റർനെറ്റ് ഓഫ് തിങ്ങ്സ് എന്നത് കൊണ്ട് അർത്ഥമാക്കുന്നത്. ഇവിടെ ആശയ വിനിമയത്തിനുള്ള ഉപാധി ഇന്റർനെറ്റ് ആണ്. തിങ്ങ്സ് (Things) എന്നത് ഉപകരണങ്ങൾ ആണ്.

Working of the Internet of Things (IoT).
Image courtesy: techtarget.com

ഫ്രിഡ്ജിലെ സെൻസറുകൾ മുട്ടയുടെ എണ്ണത്തിൽ കുറവ് വരുന്നത് നിരീക്ഷിക്കുന്നു, ആ വിവരം ഫ്രിഡ്ജ് കമ്പനിയുടെ സെർവറിലേക്കു ഇന്റർനെറ്റ് വഴി കൈമാറുന്നു. സെർവറിൽ നിന്നും വിവരം വീട്ടുടമയുടെ മൊബൈൽ ആപ്പിലേക്ക് എത്തുന്നു, നോട്ടിഫിക്കേഷൻ സ്‌ക്രീനിൽ തെളിയുന്നു. ഇതേ രീതിയിൽ, ഡോർ ലോക്ക്, സെക്യൂരിറ്റി ക്യാമറ, ലൈറ്റുകൾ, മ്യൂസിക് സിസ്റ്റം തുടങ്ങിയ കാര്യങ്ങൾ നിലവിൽ നമുക്ക് സ്മാർട്ട് ആക്കാൻ സാധിക്കും. കൂടുതൽ ഉപകരണങ്ങൾ ഉടൻ തന്നെ സ്മാർട്ട് നിരയിലേക്ക് എത്തും.

വീട് സ്മാർട്ട് ആകാൻ എന്തൊക്കെ വേണം?

ആദ്യമായി വേണ്ടത് തടസ്സമില്ലാത്ത ഇന്റർനെറ്റ് കണക്ഷൻ ആണ്. 2.4 GHz ഫ്രീക്വൻസി ബാൻഡ് ഉള്ള കണക്ഷൻ വേണം. ഇന്ന് ലഭ്യമായ ബ്രോഡ്ബാൻഡ് അടക്കമുള്ള ഇന്റർനെറ്റ് സേവനങ്ങൾ 2.4 GHz ബാൻഡ് തരുന്നുണ്ട്. IoT അധിഷ്ഠിതമായ ഉപകരണമാണ് അടുത്തതായി വേണ്ടത്. പ്രവർത്തനങ്ങളെ നിയന്ത്രിക്കാനും, നെറ്റ്‌വർക്കിനുള്ളിൽ ആശയ വിനിമയം നടത്താനുമുള്ള Sensor, Antena, micro controller എന്നിവയാണ് IoT ഉപകരണങ്ങളിൽ ഉള്ളത്. ഉപകരണം ശേഖരിക്കുന്ന വിവരങ്ങളെ IoT Gateway വഴി ഡാറ്റ വിശകലനം ചെയ്യാനുള്ള സ്ഥലത്തേക്ക് അയക്കുന്നു. ക്‌ളൗഡ്‌ സെർവറിൽ പ്രവർത്തിക്കുന്ന സോഫ്റ്റ്‌വെയർ ആവാം ഡാറ്റ വിശകലനം ചെയ്യുന്നത്. ഉപകരണത്തെ നിയന്ത്രിക്കാനുള്ള നിർദേശം കൊടുക്കാനുള്ള മൊബൈൽ ആപ്പ് (User interface) വേണം. ഡാറ്റ വിശകലനം ചെയ്‌ത ശേഷം ഉപഭോക്താവിന്റെ ഫോൺ ആപ്പിലേക്ക് വിവരം കൈമാറുന്നു.

ഇതിനൊക്കെ പുറമേ, ഉപകരണങ്ങൾ സദാ പ്രവർത്തനക്ഷമമായിരിക്കണം, കറന്റ് ഉണ്ടായിരിക്കണം. ഉദാഹരണമായി, സ്മാർട്ട് ലൈറ്റിന്റെ സ്വിച്ച് ഏപ്പോഴും ഓൺ ആയിരിക്കണം, അല്ലാത്ത പക്ഷം ഫോൺ ആപ്പിൽ നിന്നുള്ള നിർദേശങ്ങൾ സ്വീകരിക്കാൻ സാധിക്കില്ല.

ഫ്രിഡ്ജിലെ മുട്ടകളുടെ എണ്ണം സെൻസറുകൾ ശേഖരിക്കുന്നു, ആ വിവരം നേരെ IoT Gateway ഡാറ്റ വിശകലനത്തിനായുള്ള സോഫ്റ്റ്‌വെയറിലേക്കു അയക്കുന്നു. അവിടെ മുട്ടകളുടെ എണ്ണം വിശകലനം ചെയ്യുന്നു. എണ്ണം കുറവെങ്കിൽ കൂടുതൽ മുട്ടകൾ വാങ്ങി സൂക്ഷിക്കണം എന്ന നിർദേശം ഉപഭോക്താവിന്റെ ഫോൺ ആപ്പിൽ നോട്ടിഫിക്കേഷൻ ആയി നൽകുന്നു. ഈ രീതിയിലാണ് IoT ഉപകരണങ്ങൾ പ്രവർത്തിക്കുന്നത്.

IoT പ്രവർത്തനങ്ങൾ ഇന്റർനെറ്റ് വഴിയാണ് നടക്കുന്നത്. അത് കൊണ്ട് തന്നെ ഇന്റർനെറ്റ് കണക്ഷന് തടസ്സം വരാൻ പാടില്ല. കറന്റ് ചാർജ് ലാഭിക്കാൻ വീട്ടിലെ ഇന്റർനെറ്റ് മോഡം ഉപയോഗ ശേഷം ഓഫാക്കുന്ന പ്രവണതയുണ്ട്. IoT ഉപകരണങ്ങൾ ശരിയായ രീതിയിൽ പ്രവർത്തിക്കണമെങ്കിൽ ഇന്റർനെറ്റ് തടസ്സപ്പെടാൻ പാടില്ല. ഇന്റർനെറ്റ് മോഡം ആഴ്ചകളോളം, മാസങ്ങളോളം ഓഫാക്കാതെ പ്രവർത്തിപ്പിക്കുന്നതിൽ ഒരു കുഴപ്പവുമില്ല. തുടർച്ചയായി ദീർഘ കാലം പ്രവർത്തിക്കുന്നതിന് അനുയോജ്യമായ രീതിയിലാണ് മോഡത്തിന്റെ ഘടന. ചെറിയ തോതിൽ മാത്രമേ മോഡം വൈദ്യുതി ഉപയോഗിക്കുന്നുള്ളൂ, അതിനാൽ വൈദ്യുതി ഉപയോഗം കൂടുമെന്ന ഭയവും ഉപേക്ഷിക്കണം. കറന്റ് ചാർജ് കൂടുമെന്നു ഭയന്നു സ്വിച്ചുകൾ മൊത്തം ഓഫ് ചെയ്‌തു വെക്കുന്ന പ്രവണത വീട്ടിലെ പ്രായമുള്ളവർക്കുണ്ട്. നിങ്ങൾ ജോലിക്കു പോയിക്കഴിയുമ്പോൾ വീട്ടിലെ കാർന്നോരു ഇന്റർനെറ്റ് മോഡത്തിന്റെ സ്വിച്ച് അടക്കം ഓഫ് ചെയ്‌തു വെച്ചാൽ വീട് സ്മാർട്ട് ആകുകയില്ല!!

സ്മാർട്ട് ലൈറ്റിങ്

സ്മാർട്ട് ഹോം ഉപകരണം എങ്ങിനെ പ്രവർത്തിക്കുന്നു എന്നറിയാനും, അതൊന്നു പരീക്ഷിക്കാനും ആഗ്രഹമുള്ളവർക്കു സ്മാർട്ട് ബൾബുകൾ ഉപയോഗിച്ച് കൊണ്ട് തുടങ്ങാം. നിങ്ങൾ ജോലി കഴിഞ്ഞു വൈകി വീടെത്തുന്ന ആളാണെന്നു വിചാരിക്കുക. രാത്രി വീട്ടിലെത്തുമ്പോൾ ഇരുട്ടത്ത് തപ്പി തടഞ്ഞു സ്വിച്ച് കണ്ടെത്തി ബൾബുകൾ പ്രവർത്തിപ്പിക്കേണ്ട സാഹചര്യം ഒഴിവാക്കുകയാണ് നമ്മുടെ ലക്‌ഷ്യം. വീട്ടിന്റെ പുറത്തെ ഒന്നോ രണ്ടോ ബൾബുകൾ സന്ധ്യ മയങ്ങുമ്പോൾ തനിയെ പ്രവർത്തിച്ചു തുടങ്ങുകയും, രാവിലെ ഓഫ് ആകുകയും വേണം. അതല്ലെങ്കിൽ ഓഫീസിൽ നിന്നിറങ്ങുമ്പോൾ മൊബൈൽ ഫോൺ ആപ്പ് ഉപയോഗിച്ച് വീട്ടിലെ പ്രധാന ബൾബുകൾ ഓൺ ആക്കാൻ സാധിക്കണം. സ്മാർട്ട് ബൾബുകൾ ഉപയോഗിക്കുകയാണ് ഇതിനൊരു പരിഹാരം.

സ്മാർട്ട് ബൾബുകൾ ഓൺലൈൻ ഷോപ്പിംഗ് സൈറ്റുകളിൽ നിന്നും വാങ്ങാൻ ലഭിക്കും. Halonix, Wipro, Mi, Philips, Panasonic, Polycab തുടങ്ങിയ പ്രമുഖവും, അല്ലാത്തതുമായ ബ്രാൻഡുകളുടെ സ്മാർട്ട് ബൾബുകൾ വാങ്ങാൻ കിട്ടും. പ്രമുഖ ബ്രാൻഡ് ബൾബുകൾക്കു വില കൂടുതലായിരിക്കും , അല്ലാത്തവക്ക് വിലക്കുറവും ആയിരിക്കും. ഒരേ ബ്രാൻഡ് സ്മാർട്ട് ബൾബുകളുടെ വിലയിൽ ദിവസേന വ്യത്യാസം വരുന്നതായി മനസ്സിലാക്കാൻ സാധിക്കും. ഏതാനും ദിവസം ഏതാനും ബ്രാൻഡുകളെ വിവിധ ഷോപ്പിംഗ് സൈറ്റുകളിൽ നിരീക്ഷിച്ച ശേഷം വില കുറയുന്ന അവസരത്തിൽ വാങ്ങാം. ഓഫർ ഉള്ള ദിവസങ്ങളിലും വില വളരെ കുറയും. കോംബോ പാക്ക് ആയി വാങ്ങിയാലും വിലക്കുറവ് കിട്ടാറുണ്ട്. ഞാൻ ആദ്യം വാങ്ങിയത് Halonix എന്ന കമ്പനിയുടെ 10 W ബൾബ് ഒരെണ്ണം 599 രൂപക്കാണ് വാങ്ങിയത്. ഏതാനും ദിവസങ്ങൾ കഴിഞ്ഞപ്പോൾ Zunpulse എന്ന കമ്പനിയുടെ 10 W ഉള്ള രണ്ടു ബൾബുകൾ ഒരുമിച്ചു 499 രൂപക്ക് വാങ്ങാൻ കിട്ടി!!

ബൾബുകളുടെ പ്രകാശ തീവ്രത അളക്കാൻ Lumen എന്ന അളവാണ് ഉപയോഗിക്കുന്നത്. വിവിധ ബ്രാൻഡ് ബൾബുകളുടെ Lumen എത്രയെന്നു കൂടി പരിശോധിക്കുക. തൂവെള്ള നിറത്തിൽ പ്രകാശിക്കുന്നത് കൂടാതെ വിവിധ നിറങ്ങളിൽ സ്മാർട്ട് ബൾബ് പ്രകാശിപ്പിക്കാൻ പറ്റും. വീടിനു പുറത്തിടാനുള്ള സ്മാർട്ട് ബൾബുകൾക്കു വിവിധ നിറങ്ങൾ ഉള്ളത് അത്ര പ്രയോജനകരമായി എനിക്ക് തോന്നിയിട്ടില്ല. തുടക്കത്തിൽ കൗതുകത്തിനു വിവിധ നിറങ്ങൾ മാറ്റി നോക്കുമെന്നല്ലാതെ പിന്നീട് ഉപയോഗിക്കാറില്ല. തൂവെള്ള നിറം മാത്രം നൽകുന്ന സ്മാർട്ട് ബൾബ് Mi കമ്പനിക്കുണ്ട്.

ഇന്ത്യയിൽ ഉപയോഗിക്കുന്ന ബൾബിന്റെ കുറ്റി (base) B22 ആണ്. ബൾബിന്റെ മൂട്ടിൽ രണ്ടു ആണികൾ ഉണ്ടാവും, ഹോൾഡറിലെ വെട്ടിലേക്ക് ആണികൾ തിരിച്ചു കയറ്റി പൂട്ടുന്ന രീതിയിലാണ് B22 ബൾബിന്റെ ഘടന. 

 

ബൾബ് ലഭിച്ചു കഴിഞ്ഞാൽ വീട്ടിൽ എവിടെയാണോ സ്ഥാപിക്കാൻ ഉദ്ദേശിക്കുന്നത് അവിടെയുള്ള ബൾബ് ഹോൾഡറിൽ സ്ഥാപിക്കുക. അടുത്തതായി, ബൾബിനെ, സ്മാർട്ട് ഫോണുമായി കണക്ട് ചെയ്യേണ്ട പരിപാടിയാണ്. ബൾബും ഫോണും തമ്മിൽ ആശയ വിനിമയം നടത്താൻ സഹായിക്കുന്നത് ആപ്പ് ആണ്. ഓരോ കമ്പനിക്കും സ്വന്തമായി ആപ്പ് ഉണ്ടാവും. ആപ്പിന്റെ പേര് ബൾബ് പാക്കറ്റിൽ നിന്ന് മനസിലാക്കിയ ശേഷം ആൻഡ്രോയിഡ് ഫോൺ ആണെങ്കിൽ പ്ലേ സ്റ്റോറിൽ നിന്നും ആപ്പ് ഇൻസ്റ്റാൾ ചെയ്യുക. ആപ്പ് തുറന്ന ശേഷം അക്കൗണ്ട് ഉണ്ടാക്കുക.

ബൾബിനൊപ്പം ലഭിക്കുന്ന ലഘു ലേഖ വായിക്കുക. ലഘു ലേഖയിൽ പറയുന്ന അത്രയും തവണ സ്വിച്ച് ഓൺ ആക്കുകയും, ഓഫ് ആക്കുകയും ചെയ്‌താലാണ് ബൾബ് പ്രവർത്തന സജ്‌ജമാകുക. അതിനു ശേഷം, ആപ്പ് തുറന്നു ബൾബിനെ സ്‌കാൻ ചെയ്‌തു കണ്ടു പിടിച്ചു ചേർക്കണം. ഇനി ബൾബിനെ നിയന്ത്രിക്കാനുള്ള കാര്യങ്ങൾ ചെയ്യാം. ടൈമർ ഉപയോഗിച്ച് ബൾബ് പ്രവർത്തിക്കേണ്ട സമയം മുൻകൂട്ടി നിശ്ചയിക്കാം, നിറം മാറ്റാം, ആപ്പിൽ നിന്നും ഓൺ/ഓഫ് ചെയ്യാം.

വിവിധ കമ്പനികളുടെ സ്മാർട്ട് ഉപകരണങ്ങൾ ഉപയോഗിക്കേണ്ടി വരുമ്പോൾ അവയെ നിയന്ത്രിക്കാൻ നിരവധി ആപ്പുകൾ ഉപയോഗിക്കേണ്ടി വരുന്നത് ബുദ്ധിമുട്ടുണ്ടാക്കും. ചില കമ്പനികളുടെ ആപ്പുകൾ ബഗ്ഗുകൾ (Bugs) നിറഞ്ഞതാവും, പ്രവർത്തനത്തിൽ മോശമായിരിക്കാം. അത്തരം, സാഹചര്യം ഒഴിവാക്കാൻ, വിവിധ കമ്പനികളുടെ സ്മാർട്ട് ഉപകരണങ്ങളെ ഒരുമിച്ചു നിയന്ത്രിക്കാൻ പൊതു ആപ്പുകൾ (Universal) ഉപയോഗിക്കാം. Google Home, Alexa, Smart Life തുടങ്ങിയ ആപ്പുകൾ ഉപയോഗിക്കാം. ഏതു കമ്പനിയുടേയും. എല്ലാത്തരം സ്മാർട്ട് ഉപകരണങ്ങളും, ഒറ്റ ആപ്പിൽ ചേർത്ത ശേഷം നിയന്ത്രിക്കാം. 

 

സ്മാർട്ട് സ്വിച്ചുകൾ

സ്മാർട്ട് ലൈറ്റിംഗിന് ബൾബുകൾ ഉപയോഗിക്കുന്ന കാര്യമാണ് ഇത് വരെ പറഞ്ഞത്. സ്മാർട്ട് ബൾബുകൾക്കു പകരം സ്മാർട്ട് സ്വിച്ചുകൾ ഉപയോഗിക്കുകയും ചെയ്യാം. ഇവിടെ ബൾബുകൾക്കു പകരം സ്വിച്ചുകൾ സ്മാർട്ട് ആകുന്നു. സാധാരണ എൽഇഡി ബൾബുകൾ പ്രകാശത്തിനായി ഉപയോഗിക്കുകയും ചെയ്യാം. സ്മാർട്ട് സ്വിച്ചിന്റെ ഉപയോഗം ഒരുദാഹരണ സഹിതം പറയാം. വീട്ടിലെ ഷോ ലൈറ്റുകൾ ഓൺ ആക്കാൻ എല്ലാവരും മറക്കാറുണ്ട്.ഒരു സ്വിച്ചിട്ടാൽ അനേകം ലൈറ്റുകൾ കത്തുന്ന രീതിയാണ് ഷോ ലൈറ്റുകൾക്ക്. ഷോ ലൈറ്റിന്റെ സ്വിച്ചിനെ സ്മാർട്ട് ആക്കിക്കൊണ്ട് ടൈമർ സെറ്റ് ചെയ്യുക (രാത്രി 7 മുതൽ 9 വരെ). സാധാരണ LED ബൾബ്, ഫാൻ, ഫ്രിഡ്ജ്, കിണറ്റിലെ മോട്ടോർ, വാട്ടർ ഹീറ്ററുകൾ (geysers) തുടങ്ങിയ ഉപകരണങ്ങളെ സ്മാർട്ട് സ്വിച്ച് ഘടിപ്പിച്ചു സ്മാർട്ട് ആക്കാം. വിവിധ ഉപയോഗങ്ങൾക്കുള്ള, 10 A, 16 A പ്രവർത്തന ശേഷിയുള്ള സ്മാർട്ട് സ്വിച്ചുകൾ ലഭ്യമാണ്. ലൈറ്റുകൾ കത്തിക്കാൻ 10 A സ്വിച്ചുകൾ മതിയാവും. രണ്ടു തരത്തിലുള്ള സ്മാർട്ട് സ്വിച്ചുകൾ ലഭ്യമാണ്; പുതിയ വീട് വെക്കുന്നവർക്കു സ്മാർട്ട് സ്വിച്ചുകൾ വാങ്ങി വെക്കാം, നിലവിലെ പഴയ സ്വിച്ചിനെ സ്മാർട്ട് ആക്കാനുള്ള ഉപകരണം സ്വിച്ച് ബോർഡിനുള്ളിൽ സ്വിച്ചിനൊപ്പം ഘടിപ്പിക്കാം. ഒരു സ്മാർട്ട് സ്വിച്ചിനുള്ളിൽ വിവിധ എണ്ണം നോഡുകൾ ഘടിപ്പിക്കാവുന്ന വിധത്തിൽ വാങ്ങാൻ ലഭിക്കും. രണ്ടു നോഡുള്ളതിൽ രണ്ടു സ്വിച്ചുകൾ ഘടിപ്പിക്കാം. ആറു നോഡുകൾ വരെയുള്ള സ്വിച്ചുകൾ ഓൺലൈൻ ഷോപ്പുകളിൽ കണ്ടിട്ടുണ്ട്. വൈഫൈ റേഞ്ച് വീട്ടിനകത്തെ സ്മാർട്ട് സ്വിച്ചുകൾക്ക് അരികെ ലഭിക്കുമെന്നതിനാൽ പ്രവർത്തനക്ഷമത കൂടും. Tinxy, Home Mate, Tata, Sonoff തുടങ്ങിയ കമ്പനികളുടെ സ്മാർട്ട് സ്വിച്ചുകൾ ഓൺലൈൻ ഷോപ്പുകളിൽ ലഭ്യമാണ്.

 

മോഷൻ സെൻസർ ബൾബുകൾ

സ്മാർട്ട് ലൈറ്റിംഗിനായി മോഷൻ സെൻസർ ലൈറ്റുകൾ ഉപയോഗിക്കുന്നുണ്ട്. സാധാരണ ഹോൾഡറിൽ ബൾബ് സ്ഥാപിക്കുക, സ്വിച്ച് ഓൺ ആക്കി തന്നെ നിർത്തുക. ബൾബിനൊപ്പം ഒരു റഡാർ കൂടിയുണ്ടാവും. റഡാർ പരിധിയിൽ (ഉദാ. 15 അടി) ചലനം അനുഭവപ്പെട്ടാലുടൻ ബൾബ് പ്രകാശിക്കും. അനക്കം ഇല്ലായെങ്കിൽ ഒരു മിനിറ്റ് കഴിഞ്ഞു ബൾബ് തനിയെ കെടും. 

Image courtesy: halonix.co.in

ബാത്റൂം, കാർ പോർച്ച്, സ്റ്റോർ റൂം, വെട്ടം കുറഞ്ഞ ഇടനാഴികൾ തുടങ്ങിയ ഇടങ്ങളിൽ മോഷൻ സെൻസർ ലൈറ്റ് ഉപയോഗിക്കുന്നത് ഫലപ്രദമാണ്. Halonix ബ്രാൻഡ് മോഷൻ സെൻസർ ബൾബുകൾ മികച്ചതും, പൊതുവെ വിലക്കുറവുമാണ്.

സ്മാർട്ട് ഹോം സജ്ജീകരിക്കുന്നതു എങ്ങിനെയെന്ന് മനസ്സിലായെന്നു വിചാരിക്കുന്നു. ഒരു സ്മാർട്ട് ബൾബ് വാങ്ങി നിങ്ങൾക്കും പരീക്ഷിച്ച് നോക്കാവുന്നതാണ്.

 

Product Links

 

Halonix smart 10 W bulb

https://amzn.eu/d/9TF2V7U

Zunpulse smart 10 W bulb

https://amzn.eu/d/c7yMThD

Mi Smart LED white bulb

https://store.mi.com/in/item/3203900004

 

Tinxy smart switches

https://amzn.eu/d/azKdPDu

Home Mate smart switches

https://amzn.eu/d/gz3c88T

Halonix Motion Sensor bulb

https://amzn.eu/d/aeBUFcl

ഓടും കുതിര, ചാടും കുതിര

 "ഓടും കുതിര, ചാടും കുതിര, വെള്ളം കണ്ടാല്‍ നില്‍ക്കും കുതിര"

ഞാൻ പറയാൻ പോകുന്ന കുതിര ഓടില്ല, ചാടില്ല, വെള്ളം കണ്ടാലും ഭാവമാറ്റം ഒന്നും കാണിക്കില്ല. ആരെങ്കിലും എടുത്തു കൊണ്ട് ഒരിടത്തു നിർത്തിയാൽ അവിടെ അനങ്ങാതെ നിന്ന് കൊള്ളും. വീട് പണിയുടെ വിവിധ ഘട്ടങ്ങളിൽ വളരെയധികം ആവശ്യമുള്ള ഒരു ഉപകരണമാണ് കുതിര എന്ന പേരിലറിയപ്പെടുന്നത്. പ്രദേശമനുസരിച്ചു പേരിൽ വ്യത്യാസം വരുമെങ്കിലും, ഇതിന്റെ ഇംഗ്ലീഷ് പേര് സ്‌കഫോൾഡിങ് (Scaffolding) എന്നാണ്. കെട്ടിടങ്ങൾ, മറ്റ് മനുഷ്യനിർമിതികൾ എന്നിവയുടെ നിർമ്മാണം, അറ്റകുറ്റപ്പണികൾ, എന്നിവയിൽ പൊക്കത്തിൽ കയറി നിന്ന് പ്രവർത്തി ചെയ്യാൻ ജോലിക്കാരെ സഹായിക്കാൻ ഉപയോഗിക്കുന്ന താൽക്കാലിക ഘടനയാണ് കുതിര. വീട് നിർമ്മാണത്തിലെ തേപ്പ്, പെയിന്റിംഗ് തുടങ്ങിയ ഉയരത്തിലുള്ള പ്രവർത്തികൾ കയറി നിന്നു ചെയ്യാനുള്ള വർക്ക് പ്ലാറ്റുഫോം ആയി കുതിര ഉപയോഗിക്കുന്നു. 

ഫോട്ടോ കടപ്പാട്: www.peri.in

ഇരുമ്പ് പൈപ്പ് കൊണ്ടാണ് കുതിര നിർമ്മിക്കുന്നത്. നാല് പൊക്കം കൂടിയ കാലുകളും, അതിന് ബലം നൽകാൻ കുറുകെ ഉറപ്പിക്കുന്ന പൈപ്പുകൾ, കയറി നിന്ന് ജോലി ചെയ്യാനുള്ള തട്ട് എന്നിവ ചേരുന്നതാണ് കുതിരയുടെ ഘടന. ആവശ്യം കഴിഞ്ഞാൽ കുതിരയെ അഴിച്ചു മാറ്റാം. ചെറിയ പിക്കപ്പ് വണ്ടിയിൽ കയറ്റി കൊണ്ട് പോകാൻ സാധിക്കും. വലിയ നിർമ്മാണ പ്രവർത്തികളാണെങ്കിൽ ഒന്നിലധികം കുതിര ചേർത്ത് കെട്ടി ആവശ്യത്തിന് പൊക്കം തികയ്ക്കും. ചെറിയ വീടുകളുടെ നിർമ്മാണത്തിന് അധികം എണ്ണം കുതിര ആവശ്യം വേണ്ടി വരില്ല. 

ലേബർ കോൺട്രാക്ട് മാത്രമാണ് ഉള്ളതെങ്കിൽ വീട്ടുടമ കുതിര വാടകക്ക് എടുക്കേണ്ടി വരും. വീടു പണിയുടെ വിവിധ ഘട്ടങ്ങളിൽ ആവശ്യമുള്ളതായതു കൊണ്ട് പലതവണ വാടകക്ക് എടുത്തിട്ടു തിരികെ കൊടുക്കേണ്ടി വരും. ഒരു സെറ്റ് കുതിരക്ക് അറുപത് രൂപയാണ് ഒരു ദിവസത്തെ വാടകയായി ഞാൻ കൊടുത്തത്.  വീട്ടിലെത്തിക്കാനും, തിരികെ കൊണ്ട് പോകാനുമുള്ള വണ്ടിക്കൂലിയും ചിലവിനത്തിൽ പരിഗണയ്‌ക്കണം. ഓരോ തവണയും, എടുക്കാനും, കൊടുക്കാനും വീട്ടുടമ തന്നെ പോകേണ്ടി വരുന്നത് മെനക്കേടാണ്. തൊഴിലാളികൾ എന്നും ജോലിക്ക് വന്നില്ലെങ്കിൽ ആ ദിവസത്തെ വാടക കൂടി നൽകേണ്ടി വരും. 

വീട് പണി തുടങ്ങുമ്പോൾ തന്നെ ഒരു കുതിര സ്വന്തമായി വാങ്ങുകയോ, ഉണ്ടാക്കി എടുക്കുകയോ ചെയ്യുന്നതാണ് സൗകര്യപ്രദം. എത്ര കുതിര വേണ്ടി വരുമെന്നതു വീടിന്റെ വലുപ്പവും, അത് തീർക്കാനെടുക്കുന്ന സമയവും അനുസരിച്ചിരിക്കും. വീട് പണി കഴിഞ്ഞാൽ കുതിരയെ വാടകക്ക് കൊടുക്കുകയോ, വിൽക്കുകയോ ചെയ്യാം.

അർബാന എന്ന മല്ലൻ

വീട് വെച്ചവർക്ക് അർബാന എന്താണെന്നും, അതിന്റെ ഉപയോഗം എന്താണെന്നും നന്നായി അറിയാം. അർബാന (Arbana) എന്നും വീൽ ബാരോ ട്രോളി (Wheel Barrow Trolley) എന്നുമൊക്കെ ഈ വണ്ടിയെ വിളിക്കാറുണ്ട്. അർബാന എന്ന പേരാണ് നമ്മുടെ നാട്ടിൽ പ്രചാരത്തിലുള്ളത്. അർബാന എന്ന പദം അറബി ഭാഷയാണ്, ട്രോളി എന്നാണ് അർത്ഥം. വിവിധ തരം ഭാരം ചുമക്കുന്ന ജോലികളുടെ ആയാസം കുറക്കാൻ അർബാന കൊണ്ട് സാധിക്കും. ഭാരം കയറ്റിയ ശേഷം വലിച്ചു കൊണ്ട് പോകാനും, ഉന്തിക്കൊണ്ടു പോകാനും സാധിക്കും. കണ്ടാൽ നിസ്സാരനെന്നു തോന്നിയേക്കാമെങ്കിലും ഇവൻ വളരെ ഉപകാരിയാണ്, ശക്തിമാനുമാണ്. അർബാന രണ്ടു തരമുണ്ട്; ഒറ്റ ചക്രമുള്ളതും, രണ്ടു ചക്രമുള്ളതും. രണ്ടു തരത്തിലുള്ളതിനും വ്യത്യസ്തമായ ഉപയോഗമാണുള്ളത്. 

ഒറ്റ ചക്രമുള്ള അർബാന

വളവും, തിരിവുമുള്ള സ്ഥലത്തു കൂടിയും, ഇടുങ്ങിയ വഴികളിലൂടെയും ഭാരം വഹിച്ചു കൊണ്ട് പോകാൻ അനുയോജ്യം ഒരു ചക്രമുള്ള അർബാനയാണ്. ഒറ്റ ചക്രമുള്ളതിനാൽ വളവും, തിരിവും, കുണ്ടും, കുഴിയും ഒക്കെ ഓടിച്ചു കയറ്റി ഇറക്കി കൊണ്ട് പോകാം. ഒറ്റ ചക്രമുള്ളതിനാൽ ബാലൻസ് ചെയ്‌തു കൊണ്ട് പോയില്ലേൽ മറിയും. കുറച്ചു നേരത്തെ ഉപയോഗം കൊണ്ട് തന്നെ എല്ലാവർക്കും ഒറ്റ ചക്രമുള്ള അർബാന ഉപയോഗിക്കാനുള്ള ബാലൻസ് ലഭിക്കും. 

രണ്ടു ചക്രമുള്ള അർബാന

നിരന്ന പ്രതലത്തിലെ ഉപയോഗത്തിന് അനുയോജ്യമാണ് രണ്ടു ചക്രമുള്ള അർബാന. വ്യവസായ സ്ഥാപനത്തിനുള്ളിൽ, ഗോഡൗണുകളിൽ ഉപയോഗിക്കാൻ ഇരുചക്രമുള്ളതാണ് നല്ലത്. രണ്ടു ചക്രമുള്ളതിനാൽ ബാലൻസ് ഉണ്ട്, സാധനങ്ങൾ കയറ്റിക്കൊണ്ടു പോകുന്ന വഴിയിൽ ചരിയുകയില്ല, മറിയാനുള്ള സാധ്യതയും കുറവാണ്. 

3500 മുതൽ 4500 രൂപ വരെ വിവിധ സ്ഥലങ്ങളിൽ ഒറ്റ ചക്ര അർബാനക്ക് വിലയുണ്ട്. ഹാർഡ്‌വെയർ കടകളിലാണ് സാധാരണയായി ഇവ വാങ്ങാൻ ലഭിക്കുന്നത്. അർബാന നിർമ്മിക്കുന്ന സ്ഥലങ്ങൾ കണ്ടുപിടിച്ചു നേരിട്ട് വാങ്ങുകയാണെങ്കിൽ കടകളിലേതിനേക്കാൾ കുറഞ്ഞ വിലക്ക് ലഭിക്കും. ഉപയോഗ ശേഷം വിൽക്കുന്നതു വാങ്ങിയാലും വില കുറച്ചു കിട്ടും. OLX ൽ നോക്കിയാൽ പഴയതു വാങ്ങാൻ കിട്ടും.

വീട് പണി തുടങ്ങാൻ പോകുന്നവർ ഒറ്റ ചക്രമുള്ള അർബാന വാങ്ങുന്നതാണ് നല്ലത്. പറമ്പ് ഒരുക്കുമ്പോൾ തന്നെ അർബാന വാങ്ങുന്നത് ഉപയോഗപ്പെടും. മണ്ണ് മാറ്റാനും, നികത്താനും ഉപയോഗിക്കാം. അടിത്തറക്കുള്ളിൽ മണ്ണ് നിറക്കുക, എംസാൻഡ്‌, സിമന്റ് പണിസ്ഥലത്തു എത്തിക്കുന്നതിന് നിരന്തരമായി അർബാന ഉപയോഗിക്കേണ്ടി വരും. എന്റെ വീടിന്റെ അടിത്തറയിൽ മണ്ണ് നിറച്ചത് ഞാൻ തന്നെയാണ്. ജോലി കഴിഞ്ഞു വന്ന ശേഷം  അർബാന ഉപയോഗിച്ചു മണ്ണ് നിറച്ചു. വീട് പണി തുടങ്ങിക്കഴിഞ്ഞാൽ അർബാന ഉപയോഗിക്കുന്നത് കൊണ്ട് തൊഴിലാളികൾക്ക് അധ്വാനം ലഘൂകരിക്കാൻ സാധിക്കും. വീടുപണി കഴിഞ്ഞ ശേഷമുള്ള അല്ലറ ചില്ലറ പണികൾക്കും അർബാന ഉപകാരപ്പെടും. വീടുപണിക്കിടയിൽ കരാറിന്റെ ഭാഗമല്ലാത്ത പല പണികളും ഉണ്ടാവും. അത്തരം ജോലികൾ അർബാനയുടെ സഹായത്തോടെ ഉടമസ്ഥന് തന്നെ ചെയ്യാവുന്നതാണ്. അർബാന വാങ്ങേണ്ടത് ഒരാവശ്യമാണോ എന്ന് തുടക്കത്തിൽ സന്ദേഹം തോന്നിയേക്കാം. വീട് പണിക്കു വേണ്ടി അർബാന വാങ്ങുവാൻ ഒട്ടും മടിക്കേണ്ട. വീട് പണി മുഴുവൻ കരാർ നൽകിയതാണെങ്കിൽ കരാറുകാരൻ അർബാന കൊണ്ട് വരും. ലേബർ കോൺട്രാക്ട് മാത്രമാണെങ്കിൽ വീട്ടുടമയും വീട്ടുപണിയിൽ ഇടപെടേണ്ടി വരും, അർബാന ഉപയോഗപ്പെടും. അർബാന കൊണ്ട്  ജോലി ചെയ്‌തു കഴിയുമ്പോൾ നമ്മുടെ വീടിനു വേണ്ടി നമ്മളും കഷ്ടപ്പെട്ടു എന്ന് അഭിമാനിക്കാം.  വീട് പണി സംബന്ധിച്ച എല്ലാ ജോലികളും തീർന്ന ശേഷം അർബാന വേണമെങ്കിൽ വിൽക്കാം. അല്ലാത്ത പക്ഷം വാടകക്ക് കൊടുത്തു കാശുണ്ടാക്കാം.