Sunday, February 2, 2020

അതിരമ്പുഴ ജോയൽ ഹോട്ടലിലെ ദോശയും ബീഫ് കറിയും

കോട്ടയം ഏറ്റുമാനൂരിന് അടുത്തുള്ള ഒരു ചെറിയ പ്രദേശമാണ് അതിരമ്പുഴ. മഹാത്മാഗാന്ധി സർവ്വകലാശാല സ്ഥിതി ചെയ്യുന്നത് അതിരമ്പുഴയിലാണ്. കോട്ടയത്ത് നിന്നും യൂണിവേഴ്‌സിറ്റി വഴി ഏറ്റുമാനൂർ പോകുന്ന ബസുകളെല്ലാം അതിരമ്പുഴ കടന്നാണ് പോകുന്നത്. അതിരമ്പുഴ ജംഗ്ഷൻ  മുഴുവൻ നിറഞ്ഞു നിൽക്കുന്ന ചന്തയാണ് ഈ പ്രദേശത്തിന്റെ പ്രത്യേകത. വളരെ പഴക്കമുള്ളതും, പ്രതാപത്തോടെ കച്ചവടം നടന്നിരുന്ന ഒരു ചന്തയാണിത്. പച്ചക്കറികൾ, മീൻ, ഇറച്ചി, പലവ്യഞ്ജനങ്ങൾ, മലഞ്ചരക്ക്, കാർഷിക സാമഗ്രികളുടെ മൊത്ത വിൽപ്പനയും, ചില്ലറ വിൽപ്പനയും നടത്തുന്ന കടകളാണ് അതിരമ്പുഴ ചന്തയുടെ പ്രത്യേകത. പഴയ ശൈലിയിലുള്ള കെട്ടിടങ്ങളും, കടകളും ഇപ്പോഴും ഇവിടെയുണ്ട്. ഗതാഗത സൗകര്യങ്ങൾ വർദ്ധിച്ചത് കാരണം കച്ചവടം മറ്റിടങ്ങളിലേക്ക് മാറിയതു കൊണ്ടു പഴയ പ്രതാപമില്ല.


കേരളത്തിലെ എല്ലാ ചന്തകളിലും ഏതാനും നാടൻ ചായക്കടകൾ ഉണ്ടാവും. തൊഴിലാളികളുടെയും, സാധാരണക്കാരുടെയും വിശപ്പ് ശമിപ്പിക്കാൻ മിതമായ വിലക്ക് ഭക്ഷണം വിളമ്പുന്ന കടകളാവും അത്. അത്തരത്തിൽ ഒരു നാടൻ ചായക്കടയാണ് ജോയൽ റെസ്റ്റോറന്റ്. അതിരമ്പുഴ ജംഗ്‌ഷനിൽ തന്നെ റോഡരികിൽ ആണ് റെസ്റ്റോറന്റ് സ്ഥിതി ചെയ്യുന്നത്. അതിരമ്പുഴ ജംഗ്‌ഷനിൽ എത്തിയാലുടൻ തന്നെ ബസ്റ്റോപ്പിന്നു അടുത്തുള്ള കാപ്പിപ്പൊടി ഉണ്ടാക്കുന്ന മില്ലിൽ നിന്ന് ഉയരുന്ന വാസന നിങ്ങളിൽ ഉന്മേഷം നിറക്കും. ആ വാസനയും മനസ്സിൽ നിറച്ചു കൊണ്ട് ജോയൽ റെസ്റ്റോറന്റിലേക്കു നടക്കുക. ചെറിയ ഒരു കടയാണ് ഇത്. പൊറോട്ട, ദോശ, അപ്പം, ബീഫ് ഫ്രൈ-കറി, മുട്ടക്കറി, ചെറുകടികൾ തുടങ്ങിയവ ഇവിടെ ലഭിക്കും. ഉച്ച സമയത്തു് കഞ്ഞിയും ലഭിക്കും.


ഇവിടുത്തെ ബീഫ് കറിയും, ഫ്രൈയും ആണ് പ്രധാന ആകർഷണം. അത് കഴിക്കണമെങ്കിൽ ഉച്ചക്ക് ശേഷം 3 മണിയോടു കൂടി എത്തുക. പൊറോട്ടയോ, ദോശയോ ബീഫിനൊപ്പം കഴിക്കാം. ഇവിടുത്തെ ദോശയും പൊറോട്ടയും മികച്ചതാണ്. നിങ്ങൾ ദോശയും, പൊറോട്ടയും ബീഫിനൊപ്പം കഴിച്ചു നോക്കണമെന്നാണ് എന്റെ അഭിപ്രായം. ഞാൻ ദോശയാണ് ബീഫിനൊപ്പം കഴിക്കാൻ തിരഞ്ഞെടുക്കാറ്. കട്ടിയുള്ള, മാർദ്ദവമുള്ള വലുപ്പമുള്ള ദോശയാണ് ഇവിടെ തരുന്നത്. ഒന്നിലധികം പേരുണ്ടെങ്കിൽ ദോശയോടൊപ്പം ബീഫ് കറിയും, ഫ്രൈയ്യും ഓർഡർ ചെയ്യുക. ദോശയും, ബീഫും മേശമേൽ വൈകാതെ എത്തും. സാമ്പാറും, തേങ്ങാ ചമ്മന്തിയും ബക്കറ്റിൽ സമീപത്തുണ്ടാവും. വിളമ്പി തരുന്നയാൾ ചായ വേണമോ എന്ന് ആദ്യമേ ചോദിക്കും. ഇപ്പോൾ വേണ്ട എന്ന് പറയുക. ദോശ ചെറിയ കഷ്ണങ്ങളിലായി മുറിച്ചു ബീഫ് ചാറിൽ മുക്കി കഴിക്കുക. മുക്കി കഴിക്കുന്നത് ഇഷ്ടമല്ലെങ്കിൽ ബീഫ് കറിയുടെ പ്ലേറ്റ് ദോശക്കു മുകളിലേക്ക് കമഴ്‌ത്തുക. സമയമെടുത്തു ആസ്വദിച്ചു കഴിക്കുക. അധികം എരിവില്ലാത്ത ബീഫ് കറിയാണ് ഇവിടെ തരുന്നത്. ഇടക്ക് ബീഫ് ഫ്രൈയിൽ നിന്നും  ഓരോ കഷ്ണങ്ങളെടുത്തു ചവക്കുക. കഴിക്കുന്നത് മധ്യസ്ഥായിൽ എത്തുമ്പോൾ കടുപ്പമുള്ള ചൂട് ചായ ഓർഡർ ചെയ്യുക. ബീഫ് കഴിച്ചു മദോന്മത്തമായ നാവിലേക്ക് കടുപ്പമുള്ള ചൂട് ചായ പകർന്ന് കൊടുക്കുക. ആഹ്, വാഹ്, എന്താ അനുഭവം. ഇതാണ് ജോയൽ റെസ്റ്റോറന്റിലെ ബീഫ് കറിയുടെയും, ഫ്രൈയുടെയും ഗുണം. ഇനി ഒട്ടും താമസിക്കണ്ട, അതിരമ്പുഴക്ക് വണ്ടി വിട്ടോളു.

Monday, January 20, 2020

ഞാൻ ലൈബ്രറിയൻ ആയിരിന്നെങ്കിൽ....

ലൈബ്രറികളിൽ സംഘടിപ്പിക്കുന്ന പരിപാടികളിൽ വിശിഷ്ടാഥിതിയായി വരുന്നവർ പ്രസംഗത്തിനിടെ പറയുന്ന സ്ഥിരം വാചകമാണ്. "ഞാൻ ഈ പണി കിട്ടിയില്ലാരുന്നെങ്കിൽ ഒരു ലൈബ്രേറിയൻ ആകുമായിരിന്നു. എന്നിട്ട് രാവിലെ മുതൽ വൈകുന്നേരം വരെ ചുമ്മാ ഇരുന്നു പുസ്‌തകങ്ങൾ വായിച്ചു കൂട്ടിയേനെ".

ഇത്തരം വാചകങ്ങൾ യാഥാർഥ്യവുമായി ഒരു ബന്ധവുമില്ലാത്തതാണ്. സ്‌കൂൾ, കോളേജ്, യൂണിവേഴ്‌സിറ്റി, റിസർച്ച് ലൈബ്രറികളിൽ ലൈബ്രേറിയന്മാർക്ക് പിടിപ്പതു പണിയുണ്ട്. മിക്ക ലൈബ്രറികളിലും ആവശ്യത്തിന് സ്റ്റാഫ് ഉണ്ടാവില്ല. അതിനാൽ തിരക്കോട് തിരക്കായിരിക്കും. ലൈബ്രറിയിലെ എല്ലാ പണികളും തനിയെ ചെയ്യേണ്ടി വരും. Multitasking ചെയ്യാൻ താൽപര്യവും, കഴിവും ഉള്ളവർക്ക് പറ്റിയ പണിയാണ് ലൈബ്രറിയൻ ആകുക എന്നത്. സാഹിത്യ അഭിരുചി (optional), വിവിധ വിഷയങ്ങളെക്കുറിച്ചുള്ള പരന്ന അറിവ്, കമ്പ്യൂട്ടർ ജ്ഞാനം (നന്നായിട്ടു വേണം), ഗവേഷണം, അധ്യാപനം, അഡ്മിനിസ്‌ട്രേഷൻ, ക്ലറിക്കൽ വർക്ക്, മാർക്കറ്റിംഗ് (അതില്ലെങ്കിൽ ആരും ലൈബ്രറിയിൽ വരില്ല), technical writing, event management എന്നീ ഗുണങ്ങൾ ഉണ്ടെങ്കിൽ നല്ല ഒരു ലൈബ്രേറിയൻ എന്ന പേര് കേൾപ്പിക്കാം. അല്ലാത്ത പക്ഷം ചീത്തപ്പേര് ആവും ഫലം. ഇതിനൊക്കെ പുറമെ ലൈബ്രറി ഭിത്തിയിൽ ആണി അടിക്കാൻ ഏണി വെച്ച് കേറേണ്ടി വരും, ഫ്യൂസ് പോയാൽ തനിയെ കെട്ടേണ്ടി വരും. അത്തരം പണിക്കും തയ്യാറായിരിക്കണം, ആരും സഹായത്തിനുണ്ടാവില്ല. അധ്യാപകർ പഠിപ്പിച്ചാലും, ഇല്ലെങ്കിലും സമൂഹം ഒരേ ബഹുമാനം കൊടുക്കും. ലൈബ്രേറിയൻ നന്നായി പ്രവർത്തിച്ചാലും മറ്റുള്ളവർ അംഗീകാരമോ, പ്രശംസയോ, ബഹുമാനമോ തരണമെന്നില്ല. ലൈബ്രറിയിൽ വരുന്നവർ ചേട്ടാ, ചേച്ചി എന്നൊക്കെ വിളിച്ചെന്നിരിക്കും!! അതൊക്കെ കേട്ട് വിഷമിക്കരുത് (മറ്റു ഓഫീസുകളിലെ പീയൂണിനെ പോലും പൊതുജനങ്ങൾ സാറേ എന്ന് വിളിക്കും). എത്ര ജോലി ചെയ്‌താലും ലൈബ്രറിയിലെ ജോലി quantify ചെയ്‌തു കാണിക്കാൻ പറ്റാത്തതു ഒരു പോരായ്മയാണ്. അത് കൊണ്ട് തന്നെ ലൈബ്രേറിയൻ ഒന്നും ചെയ്യുന്നില്ല എന്ന ധാരണ മേലധികാരികൾക്ക് ഉണ്ട്.

ലൈബ്രറിയിലെ ദൈനംദിന ജോലിക്ക് പുറമെ ലൈബ്രേറിയന്റെ തലക്കു മീതെ തൂങ്ങിക്കിടക്കുന്ന ഡെമോക്ളീസിന്റെ വാളുകളാണ്, PhD പൂർത്തിയാക്കുക, UGC NET കിട്ടിയില്ലെങ്കിൽ അതിന് ശ്രമിക്കുക, സർവീസ് വിഷയങ്ങൾ തീർക്കുക, ട്രെയിനിങ്-കോൺഫറൻസ് പങ്കെടുക്കുക, ജേർണൽ-കോൺഫറൻസ് പേപ്പറുകൾ എഴുതുക തുടങ്ങി സ്വന്തം പ്രൊമോഷൻ വേണ്ടിയുള്ള പണികൾ ഒരു വശത്തു കൂടി ചെയ്യണം. എല്ലാ ലൈബ്രേറിയന്മാരും മുകളിൽ പറഞ്ഞ ഗുണഗണങ്ങൾ ഉണ്ട് എന്ന് അർത്ഥമില്ല. എല്ലാ തൊഴിൽ മേഖലയിലെയും പോലെ സമർഥ്യം ഉള്ളവരും, ഇല്ലാത്തവരും ഒക്കെ ഉണ്ട്. പൊതുവെ മിക്ക ലൈബ്രേറിയന്മാരും പുതിയ അറിവ് സമ്പാദിക്കുന്നതിൽ മിടുക്കന്മാരാണ്. ട്രെയിനിങ്, കോൺഫറൻസ്, ലൈബ്രേറിയന്മാരുടെ സോഷ്യൽ മീഡിയ ഗ്രൂപ്പുകൾ വഴി പുതിയ അറിവുകൾ ആർജ്ജിച്ചു കൊണ്ടിരിക്കും.

രാവിലെ ലൈബ്രറിയിൽ എത്തി കസേരയിൽ ഇരുന്നു പുസ്‌തകം വായിച്ചാൽ മതി എന്ന ലൈബ്രേറിയന്റെ ജോലിയെക്കുറിച്ചുള്ള മുൻവിധി മാറ്റുക പ്രസംഗ കേസരികളെ. പുസ്‌തകം വായിക്കാൻ ലൈബ്രേറിയൻ ആകേണ്ട കാര്യമില്ല. ഒരു Amazon Kindle E-reader വാങ്ങിയാൽ ലോകത്ത് എവിടെയും ഇറങ്ങിയ പുസ്തകങ്ങൾ മനസമാധാനത്തോടെ വായിക്കാം. ഇപ്പറിഞ്ഞതിനർത്ഥം, ലൈബ്രേറിയന്മാർ തീരെ പുസ്‌തക പുഴുക്കൾ അല്ല എന്നല്ല, ലൈബ്രേറിയന്മാരുടെ കൂട്ടത്തിലും ധാരാളം സാഹിത്യകാരന്മാരും, സാഹിത്യ അഭിരുചി ഉള്ളവരും, കലാകാരന്മാരും ഒക്കെ ഉണ്ട്.

പിൻവിളി: ഇത് വായിക്കുന്നവർ കാലാവധി കഴിഞ്ഞും കൈവശം സൂക്ഷിച്ചിരിക്കുന്ന പുസ്തകങ്ങൾ എത്രയും വേഗം ലൈബ്രറിയിൽ തിരികെ എൽപ്പിക്കുക. തിരുവനന്തപുരത്തുള്ള ഒരു പ്രസംഗ തൊഴിലാളി പല ലൈബ്രറികളിൽ നിന്നും എടുത്ത പുസ്തകങ്ങൾ തിരികെ കൊടുക്കാതെ വീട്ടിൽ തന്നെ ഒരു ഹോം ലൈബ്രറി ഉണ്ടാക്കി എന്ന് കേട്ടിട്ടുണ്ട്.

Wednesday, January 1, 2020

ആറങ്ങോട്ടുകരയിലെ കളിമൺ വ്യവസായം

തൃശൂർ ജില്ലയുടെ അതിർത്തിയിലുള്ള ചെറിയ ഒരു ഗ്രാമമാണ് ആറങ്ങോട്ടുകര. പാലക്കാട് ജില്ലയോട് അതിരു പങ്കിടുന്ന ഒരു ഗ്രാമം ആണ്. കളിമൺ ഉൽപ്പന്ന നിർമ്മാണത്തിന് പേര് കേട്ട ഒരു പ്രദേശമാണിത്. കിണർ റിങ്ങുകൾ, പാചകത്തിന് ഉപയോഗിക്കുന്ന മൺപാത്രങ്ങൾ, ചെടിച്ചട്ടികൾ, പ്രതിമകൾ, അലങ്കാര വസ്‌തുക്കൾ തുടങ്ങിയവയാണ് ഇവിടെ നിർമ്മിക്കുന്നത്. കിണറുകൾക്കു സാധാരണയായി കോൺക്രീറ്റ് റിങ്ങുകൾ ആണ് സാധാരണ ഉപയോഗിക്കാറ്. പക്ഷെ കളിമൺ റിങ്ങുകൾ പ്രകൃതിദത്ത വസ്‌തുവായ മണ്ണ് കൊണ്ട് നിർമിച്ചതാകയാൽ ആരോഗ്യത്തിനു നല്ലതാണ്, ജലത്തിന് നല്ല കുളിർമ്മയും കിട്ടും.

കളിമണ്ണ് കൊണ്ട് നിർമ്മിച്ച കിണർ റിങ്ങുകൾ.
നല്ല കളിമണ്ണ് ലഭിക്കാത്തതു വ്യവസായത്തെ ബാധിക്കുന്നുണ്ട് എന്ന് തൊഴിലാളികൾ പറഞ്ഞു. സമീപ പ്രദേശങ്ങളിൽ കളിമണ്ണിന്റെ ലഭ്യത കുറഞ്ഞത് കൊണ്ട് ദൂര സ്ഥലങ്ങളിൽ നിന്നും എത്തിക്കുന്നത് ചെലവ് കൂട്ടുന്നു.

കളിമണ്ണ് ചവിട്ടിക്കുഴച്ചു പരുവമാക്കുന്നു 
പാത്ര നിർമ്മാണത്തിനുള്ള കളിമണ്ണ് കുഴച്ചു വെച്ചിരിക്കുന്നു.


പാത്രങ്ങൾ ഉണങ്ങാൻ വെച്ചിരിക്കുന്നു.
പത്രങ്ങൾ ചൂളയിൽ വേകാൻ അടുക്കി വെച്ചിരിക്കുന്നു 
കളിമൺ വ്യവസായം പ്രതിസന്ധികളെ നേരിടുകയാണെന്ന് തൊഴിലാളികൾ സൂചിപ്പിച്ചു. നോട്ട് നിരോധനത്തിന് ശേഷം കച്ചവടം കുത്തനെ ഇടിഞ്ഞു. മുപ്പതിനായിരം രൂപയുടെ കച്ചവടം ദിവസേന നടന്നിരുന്ന സ്ഥാനത്തു ഇന്ന് തൊഴിലാളികൾക്ക് നൽകാനുള്ള ദിവസക്കൂലിക്കുള്ളതു പോലും കിട്ടുന്നില്ല. കുലത്തൊഴിൽ ആയതു കൊണ്ട് നിർമ്മാണം തീർത്തും നിർത്തി വെക്കുന്നില്ല എന്ന് അവർ പറഞ്ഞു.

കുറിപ്പ്: ആതിര മൺപാത്ര നിർമ്മാണ സ്ഥാപനം നടത്തുന്ന ശ്രീ. പൊന്നു ആണ് ഞങ്ങൾക്ക് കാര്യങ്ങൾ വിശദീകരിച്ചു തന്നത്. കിണർ റിങ്ങുകൾ, പുകയില്ലാത്ത അടുപ്പുകൾ, കൂജ, ചെടിച്ചട്ടികൾ, മൺപാത്രങ്ങൾ തുടങ്ങിയവ ഇദ്ദേഹം നിർമ്മിക്കുന്നുണ്ട്. Ponnu ഫോൺ നമ്പർ 9539642746, 9947984580

Sunday, December 29, 2019

ഷാലിമാർ ഹോട്ടലിലെ ബിരിയാണി

ചെറുതുരുത്തിയിലെ ഷാലിമാർ ഹോട്ടലിലെ ബിരിയാണിയെക്കുറിച്ചു എഴുതാതിരിക്കാൻ ആവില്ല. അവിടെ നിന്നും ബീഫ് ബിരിയാണി കൂടി കഴിച്ചതോടെ ഇനി എഴുതാതിരിക്കാൻ തീരെ നിവൃത്തിയില്ല. ഷൊർണ്ണൂർ വഴി യാത്ര ഉണ്ടെങ്കിൽ ഷാലിമാർ ഹോട്ടലിൽ കയറാതെ പോകരുത്. തൃശ്ശൂർ ഭാഗത്തു നിന്ന് വരുമ്പോൾ ചെറുതുരുത്തി ജംഗ്ഷനിൽ, പുതിയ കൊച്ചി പാലത്തിനു തൊട്ടു മുന്നേ ആണ് ഹോട്ടൽ സ്ഥിതി ചെയ്യുന്നത്. ട്രെയിൻ മാർഗം വരുന്നവർ ഷൊർണ്ണൂർ റെയിൽവേ സ്റ്റേഷനിൽ ഇറങ്ങി, മുന്നിലുള്ള ബസ് സ്റ്റോപ്പിൽ നിന്നും തൃശൂർ ബസിൽ കയറിയാൽ (ചെറുതുരുത്തി എന്ന് ബസുകാരോട് പറയുക) ഹോട്ടലിനു മുന്നിൽ ഇറങ്ങാം. ഒരു പത്തു മിനിറ്റു യാത്ര. 

മുകളിലത്തെ നിലയിൽ ഉച്ചക്ക് വെജിറ്റേറിയൻ ഊണ് വിളമ്പും, താഴത്തെ നിലയിൽ മാംസ വിഭവങ്ങളും ലഭിക്കും. രാത്രി വൈകിയും ഈ ഹോട്ടൽ പ്രവർത്തിക്കുന്നുണ്ട്. ഏതു നേരത്തു ചെന്നാലും ബിരിയാണി കിട്ടും എന്നതാണ് പ്രത്യേകത. ഏതു വിഭവങ്ങൾക്കും മികച്ച രുചി ആണ്. മസാല ദോശയും, നെയ്‌റോസ്റ്റിനും ഒക്കെ അപാര രുചിയാണ്. രാവിലെ ഞങ്ങൾ ഇവിടെ നിന്നും പൊറോട്ടയും, ചിക്കൻ കറിയും കഴിച്ചു. മികച്ച മസാല ചാറിൽ മുങ്ങിയ ചിക്കൻ പീസും, അടരുകളായി ഇളകി വരുന്ന പൊറോട്ടയും രുചി മുകുളങ്ങളെ ആനന്ദ നൃത്തമാടിക്കും.

ഇനി ബിരിയാണിയെക്കുറിച്ചു പറയാം. ചിക്കൻ ബിരിയാണിയും, ബീഫ് ബിരിയാണിയും ആണ് ഈ ഹോട്ടലിലെ വിഭവ പ്രമുഖർ. ഇവിടുന്നു ചിക്കൻ ബിരിയാണി പലതവണ കഴിച്ചിട്ടുണ്ടെങ്കിലും, ബീഫ് ബിരിയാണി കഴിക്കുന്നത് ഇന്നാണ്. വടക്കൻ കേരളത്തിലെ ബിരിയാണി കഴിച്ചു തുടങ്ങിയതിനു ശേഷം തെക്കൻ ബിരിയാണി വെറുത്തു തുടങ്ങി എന്ന് പറയുന്നതാവും ശരി. തെക്കൻ കേരളത്തിലെ ബിരിയാണി ഓരോ തവണ കഴിച്ചു കഴിയുമ്പോൾ ദൃഢ പ്രതിജ്ഞ എടുക്കാറുണ്ട് ഇനി മേലാൽ തെക്കന്മാരുടെ ബിരിയാണി കഴിക്കില്ല എന്ന്. ഫ്രൈഡ് റൈസ് ഉണ്ടാക്കാൻ ഉപയോഗിക്കുന്ന ബസുമതി അരി കൊണ്ട് ഉണ്ടാക്കുന്ന തെക്കൻ ബിരിയാണിയിൽ ഡാൽഡ, മസാല എന്നിവയുടെ ആധിക്യം കൂടുതലാണ്. എങ്ങനേലും കഴിച്ചിട്ട് എഴുന്നേറ്റു പോയാൽ മതിയെന്നാവും. വടക്കൻ  കേരളത്തിലെ ബിരിയാണി എത്ര കഴിച്ചാലും മടുക്കില്ല. ജീരകശാല അരിയും, പാകത്തിന് മസാലയും, നെയ്യും, മൃദുവായ മാംസവും വള്ളുവനാടൻ-മലബാർ ഭാഗത്തെ ബിരിയാണിയെ മികച്ചതാക്കുന്നു. 


ഷാലിമാർ ഹോട്ടലിൽ കയറുമ്പോൾ തന്നെ ജീരകശാല അരിയും, നെയ്യും, ചിക്കനും ചേർന്ന കൊതിയൂറിക്കുന്ന ഗന്ധം നിങ്ങളെ സ്വാഗതം ചെയ്യും. സൗമ്യൻമാരായ സപ്ലയർമാർ അടുത്തു വന്നു നിങ്ങളുടെ ഹിതം തിരക്കും. ഏതു ബിരിയാണി വേണം എന്ന് അവരെ അറിയിക്കുക. ആദ്യം തന്നെ തിളച്ച വെള്ളത്തിൽ കഴുകിയ പ്ലേറ്റ് നിങ്ങളുടെ മുന്നിലെത്തും. സലാഡ്, അച്ചാർ പാത്രങ്ങൾ നിങ്ങൾക്കരികിലേക്ക് ഓടിയെത്തും. പുറകെ ബിരിയാണി പൊത്തി നിറച്ച പ്ലേറ്റും എത്തും. ബിരിയാണി കൂനയുടെ മുകളിലെ നെയ്യിൽ വറുത്തു  കോരിയ അണ്ടിപ്പരിപ്പും, ഉണക്ക മുന്തിരിയും ശ്രദ്ധിക്കുക. ഉച്ചക്ക് ആണെങ്കിൽ ഒരു ചെറിയ ഗ്ലാസ് പായസവും തരും. കൂടെയുള്ള സ്പൂൺ കൊണ്ട് ബിരിയാണി പതുക്കെ പ്ലേറ്റിലേക്കു തട്ടിയിടുക, പ്ലേറ്റിൽ നിന്ന് ഉതിരുന്ന ഗന്ധം ആദ്യം ആസ്വദിക്കുക. വടക്കൻ ബിരിയാണി ആണെങ്കിലും, ഒരു മുട്ടയും ഉണ്ടാവും. തെക്കൻ കേരളക്കാർക്കു മുട്ടയില്ലാതെ ബിരിയാണി ഇറങ്ങില്ല!! മുട്ടയുള്ളതു കൊണ്ട് തെക്കന്മാർക്കു ആശ്വസിക്കാം.

ബീഫ് ബിരിയാണി
ബിരിയാണി കഴിച്ചു കഴിയുമ്പോൾ ഒരു ബിരിയാണി കൂടി കഴിക്കാൻ തീർച്ചയായും നിങ്ങൾക്ക്  തോന്നും. ചിക്കൻ/ബീഫ് കഷ്ണങ്ങൾ കുറച്ചു മിച്ചം വെച്ചേക്കുക. ബിരിയാണി ചോറ് രണ്ടാമതും വാങ്ങാം (രൂപ കൊടുക്കണം കേട്ടോ). ഒട്ടും മടി വിചാരിക്കണ്ട. ബിരിയാണി കഴിച്ചു കഴിഞ്ഞു സോപ്പിട്ടു കൈ കഴുകാതിരിന്നാൽ ബിരിയാണി ഗന്ധം വൈകുന്നേരം വരെ ആസ്വദിക്കാം!!

Wednesday, October 9, 2019

ഒരു പാലക്കാടൻ യാത്ര: മുതലമട

ഇത്തവണ പൂജ അവധിക്കു യാത്ര പോകാൻ തിരഞ്ഞെടുത്തത് കണ്ടു മതിവരാത്ത പാലക്കാടു ജില്ല ആണ്. 2015ൽ പാലക്കാടിന്റെ ചെറിയൊരു ഭാഗം കണ്ടെങ്കിലും, തിരികെ വരും എന്ന എന്ന തീരുമാനത്തിലാണ് അന്ന് പിരിഞ്ഞത്. വൈകി വന്ന കാലവർഷം പാലക്കാടിനെ പച്ചപ്പട്ട് ഉടുപ്പിച്ച സമയമാണ് ഞങ്ങൾ സന്ദർശനത്തിന് എത്തിയത്. തെക്കൻ പാലക്കാട് ജില്ലയിൽ ഉള്ള മുതലമട റെയിൽവേ സ്റ്റേഷൻ, മീങ്കര, ചുള്ളിയാർ ഡാമുകൾ, മീൻവല്ലം വെള്ളച്ചാട്ടം തുടങ്ങിയ മനസ്സ് കുളിർക്കുന്ന കാഴ്ചകൾ ഞങ്ങൾക്കു ഇത്തവണ കാണാൻ സാധിച്ചു. 

മുതലമട റെയിൽവേ സ്റ്റേഷൻ
കേരളത്തിലെ പ്രകൃതി ഭംഗിയുള്ള വളരെ ചുരുങ്ങിയ എണ്ണമുള്ള റെയിൽവേ സ്റ്റേഷനുകളിൽ പ്രധാനിയാണ് മുതലമട റെയിൽവേ സ്റ്റേഷൻ. ഈ റെയിൽവേ സ്റ്റേഷൻ ചില മലയാള സിനിമകളിലൂടെ നമുക്കെല്ലാം പരിചിതമാണ്. വെട്ടം, മേഘം, ഒരു യാത്രാ മൊഴി, എന്നിങ്ങനെ ഏതാനും മലയാളം സിനിമകളുടെ ചിത്രീകരണത്തിന് വേദിയായിട്ടുണ്ട്.




പ്ലാറ്റഫോമിന്റെ നടുക്കായി വേരുകൾ തൂങ്ങി തറയിലേക്ക് നിൽക്കുന്ന ആൽമരങ്ങളും, ചുറ്റുമുള്ള നിബിഡമായ പച്ച ഇലച്ചാർത്തുകളും, അതിനിടയിലൂടെ തല പൊന്തിച്ചു നോക്കുന്ന കരിമ്പനകളും ആണ് മുതലമട സ്റ്റേഷന് ഭംഗി കൂട്ടുന്നത്. ആൽചുവടുകളിൽ ഇട്ടിരിക്കുന്ന ബെഞ്ചുകളിൽ കാറ്റും, കുളിർമ്മയും ആസ്വദിച്ചു കൊണ്ട് എത്ര നേരമിരുന്നാലും സമയം പോകുന്നതറിയില്ല. 


പാലക്കാട് ഭാഗത്തു നിന്നും രാവിലെ 4:20നു പുറപ്പെടുന്ന പാലക്കാട് ജംഗ്ഷൻ-തിരുച്ചെന്ദുർ പാസ്സഞ്ചർ ട്രെയിൻ (56769) മാത്രമേ ഇവിടെ നിർത്തുന്നുള്ളു. രാത്രി 9:35നു ഈ ട്രെയിൻ തിരികെ വരുന്ന വഴി മുതലമടയിൽ നിർത്തും. മറ്റു ട്രെയിനുകൾക്കൊന്നും ഇവിടെ സ്റ്റോപ്പില്ല. ഈ വഴി പോയാൽ പൊള്ളാച്ചിയിൽ എത്താം. മുതലമടയിൽ നിന്നും പൊള്ളാച്ചിക്കു ട്രെയിൻ മാർഗം 24 കിലോമീറ്റർ ദൂരമേയുള്ളൂ. ഈ റെയിൽ മാർഗം മീറ്റർ ഗേജിൽ നിന്നും, ബ്രോഡ് ഗേജിലേക്കു മാറ്റിയത് 2015ൽ മാത്രമാണ്. 

ഞങ്ങൾ ആലത്തൂർ നിന്ന് ബസുകൾ മാറിക്കയറിയാണ് മുതലമടയിൽ എത്തിയത്. ആലത്തൂർ, നെന്മാറ, കൊല്ലങ്കോട് വഴി കമ്പ്രത് ചള്ള (Kambrathchalla) എന്ന സ്റ്റോപ്പിൽ ബസിറങ്ങി. ഇവിടങ്ങളിൽ സ്ഥലപ്പേരിനോപ്പം 'ചള്ള' എന്നുകൂടി ചേർത്താണ് അറിയപ്പെടുന്നത്. അവിടെ നിന്നും ഒരു ഓട്ടോ പിടിച്ചു മുതലമട റെയിൽവേ സ്റ്റേഷനിലേക്ക് യാത്ര തുടർന്നു. മാന്തോപ്പുകളുടെ ഇടയിലെ നാട്ടുവഴികളിലൂടെ കുണുങ്ങിയോടുന്ന ഓട്ടോറിക്ഷക്കുള്ളിൽ ഇരുന്നു ഞങ്ങൾ യാത്ര ആസ്വദിച്ചു. കേരളത്തിൽ ഏറ്റവുമധികം വാണിജ്യാടിസ്ഥാനത്തിൽ മാമ്പഴ കൃഷി ചെയ്യുന്ന സ്ഥലം എന്ന വിശേഷണം കൂടി മുതലമടക്കുണ്ട്.


സ്റ്റേഷന്റെ പുറത്തു എത്തിയപ്പോൾ ആകെപ്പാടെ ഒരു വിജനത അനുഭവപ്പെട്ടു. വലിയ മരങ്ങൾ വളർന്നു നിൽക്കുന്ന സ്റ്റേഷൻ പരിസരം. സ്റ്റേഷനിലെ കൗണ്ടറിന്റെ പുറത്തു നിന്ന് കൊണ്ട്, അകത്തിരുന്ന ജീവനക്കാരനോട് ട്രെയിൻ സമയം അന്വേഷിച്ചു. അയാൾ കേൾക്കാത്തത് പോലെ എന്തോ ചെയ്‌തു കൊണ്ടിരിന്നു, ഒരക്ഷരം മിണ്ടിയില്ല. സ്റ്റേഷന്റെ വേറൊരു വശത്തു ഒരു ജീവനക്കാരി സാമ്പാറിനുള്ള പച്ചക്കറി കഷണങ്ങൾ അരിഞ്ഞു പാത്രത്തിൽ നിറച്ചു വെച്ചിരിക്കുന്നു. അവർ ഉച്ചഭക്ഷണം തയ്യാറാക്കുന്ന തിരക്കിലാണ്. അടുത്തു കടകൾ ഒന്നുമില്ലാത്തതിനാൽ പാചകം സ്വയം ചെയ്യണം. ഞങ്ങൾ ആൽമരങ്ങൾ നിൽക്കുന്ന രണ്ടാമത്തെ പ്ലാറ്റുഫോമിലേക്കു നടന്നു. അവിടെയാണ് യഥാർത്ഥ മേളം നടക്കുന്നത്. പൂജ അവധി ആഘോഷിക്കുന്ന ഒരു പറ്റം കുട്ടികൾ. അവർ ആൽമരത്തിന്റെ വേരുകൾ കൂട്ടിക്കെട്ടി ഊഞ്ഞാൽ ആടുകയാണ്. അവരുടെ മുത്തശ്ശി അടുത്തുള്ള ബഞ്ചിൽ ഇരിപ്പുണ്ട്. അവർ തൊട്ടടുത്തു താമസിക്കുന്നവരാണ്.

ഞങ്ങൾ ആൽമരചുവട്ടിൽ ഇരുന്നും കിടന്നും രണ്ടു മണിക്കൂറോളം സമയം ചിലവഴിച്ചു. മധ്യവയസ്‌ക്കനായ ഒരു മനുഷ്യൻ ധൃതി വെച്ച് പ്ലാറ്റഫോമിലൂടെ നടന്നു പോകുന്നുണ്ടായിരുന്നു. അദ്ദേഹത്തെ പിടിച്ചു നിർത്തി തിരികെ പോരാനുള്ള വഴി ചോദിച്ചു. ഏതോ കഠിനാധ്വാനം കഴിഞ്ഞ ശേഷം റെയിൽവേ സ്റ്റേഷന്റെ സമീപത്തുള്ള കള്ളു ഷാപ്പിലേക്കു പോകുകയാണെന്ന് അയാൾ പറഞ്ഞു. പുറത്തുള്ള റോഡിൽ ചെന്നാൽ ഓട്ടോറിക്ഷ കിട്ടുമെന്ന് പറഞ്ഞു. റോഡിൽ കാത്തു നിന്ന ഞങ്ങളെ ആ വഴി പോയ ഒരാൾ വീട്ടിൽ നിന്നും ഓട്ടോറിക്ഷ കൊണ്ട് വന്നു ഞങ്ങളെ തിരികെ കമ്പ്രത് ചള്ളയിൽ എത്തിച്ചു. അവിടെയുള്ള മുരളി ഹോട്ടലിൽ നിന്നും മട്ടൺ കറിയും കൂട്ടി ചോറുണ്ട ശേഷം ഞങ്ങൾ മീങ്കര അണക്കെട്ടു കാണാൻ തിരിച്ചു.

Thursday, September 5, 2019

കുഴിമന്തി മഹാത്മ്യം

കോഴിക്കോട് നഹ്‌ദി റെസ്റ്റോറന്റിലെ കുഴിമന്തി
കുഴിമന്തി എന്ന മധ്യപൂർവ ദേശത്തു നിന്നുള്ള വിഭവം സ്വാദിന്റെ മികവിൽ കേരളക്കരയെ ഇളക്കിമറിക്കുകയാണ്. മധ്യപൂർവ ദേശത്തെ ബിരിയാണി വിഭവങ്ങളുടെ ഒരു ബന്ധുവാണ് കുഴിമന്തി. യമൻ ആണ് ഉത്ഭവ ദേശം. അറബി വിഭവമായ മന്തി വകഭേദങ്ങളിൽ ഒന്നാണ് കുഴിമന്തി. അരി, മാംസം, മസാലക്കൂട്ടുകൾ ചേർത്ത് ആവിയിൽ വേവിച്ചു ഉണ്ടാക്കുന്ന വിഭവങ്ങളാണ് മന്തി ഗണത്തിൽ പെടുന്നവ. കോഴി, ആട് മാംസങ്ങൾ ആണ് പ്രധാനമായും മന്തി വിഭവങ്ങളിൽ ഉപയോഗിക്കുന്നത്. ബിരിയാണി, കബ്‌സ എന്നിവയാണ് നമുക്ക് പരിചയമുള്ള മന്തി വിഭവങ്ങൾ. കുഴിയിൽ സ്ഥാപിച്ചിട്ടുള്ള തന്തൂരി അടുപ്പിൽ പാത്രം ഇറക്കി വെച്ചാണ് കുഴിമന്തി ഉണ്ടാക്കുന്നത് എന്നതാണ് പ്രത്യേകത. അതിനാലാണ് കുഴിമന്തി എന്ന പേര് വന്നത്. മലയാളി പ്രവാസികളാണ് കുഴിമന്തിയെ കേരളക്കരക്കു പരിചയപ്പെടുത്തിത്തന്നത്.

ബസുമതി അരിയാണ് കുഴിമന്തി ഉണ്ടാക്കാൻ ഉപയോഗിക്കുന്നത്. കഴുകിയ അരി വലിയ പാത്രത്തിൽ നിറക്കുന്നു. പാതി വേവിക്കുന്നു. കോഴി, അല്ലെങ്കിൽ ആട് മാംസം ഉപയോഗിച്ചാണ് മന്തി തയ്യാറാക്കുന്നത്. കടുപ്പമുള്ള മസാല, എണ്ണ എന്നിവയുടെ  ഉപയോഗം കുഴിമന്തിയിൽ കുറവാണ്. വൃത്തിയാക്കിയ മാംസത്തിൽ മസാല തേച്ചു പിടിപ്പിച്ചു വട്ടത്തിലുള്ള ഗ്രില്ലിന്റെ മുകളിൽ നിരത്തി വെക്കും. ആഴമുള്ള കുഴി അടുപ്പിൽ വിറകു കത്തിച്ചു ചൂടാക്കുന്നു. കനൽ പരുവം ആകുമ്പോൾ അടുപ്പു തയ്യാറാകുന്നു.  പാതി വെന്ത ബസുമതി അരിയുടെ ചെമ്പു കുഴിയിലേക്ക് ഇറക്കി വെക്കുന്നു. അതിനു മുകളിൽ മസാല പുരട്ടിയ മാംസം നിരത്തിയ ഗ്രിൽ ചെമ്പിന്റെ മുകളിൽ വെക്കുന്നു. അടുപ്പിന്റെ മുകൾഭാഗം ചേർത്ത് അടക്കുന്നു. രണ്ടു മണിക്കൂറോളം വേണം മന്തി പാകമാവാൻ.  കൂടുതൽ നേരം ഉയർന്ന ചൂടിൽ വേവുന്ന കാരണം മാംസം നന്നായി വെന്തു മൃദുവാകുന്നു. ഇറച്ചി വെന്ത്, മസാലയും ചേർന്ന ചാറ് അരിയിലേക്കു ഇറങ്ങും. രണ്ടു മണിക്കൂർ കഴിഞ്ഞു അടുപ്പിന്റെ മൂടി തുറക്കുന്നു. കുഴിയടപ്പിൽ നിന്നും പാത്രം വലിച്ചു കയറ്റുന്നു. ചോറ് ഇളക്കി മറ്റു പാത്രങ്ങളിലേക്ക് മാറ്റുന്നു. ചൂടോടെ പ്ലേറ്റിൽ കുഴിമന്തി ചോറും, ഇറച്ചിയും വിളമ്പി കഴിക്കാം. ഉപദംശങ്ങളായി മയോണൈസ്, പച്ചക്കറി സാലഡ് എന്നിവ ഉണ്ടാവും. കുഴിമന്തി ഉണ്ടാക്കുന്ന വിധം താഴെ കാണുന്ന വിഡിയോയിൽ വിശദമായി കാണാം.

Monday, August 26, 2019

കൃത്യമായ അളവിൽ വസ്ത്രങ്ങൾ എങ്ങനെ ഓൺലൈൻ ഷോപ്പിൽ നിന്ന് വാങ്ങാം

വസ്‌ത്രങ്ങൾ ഓൺലൈൻ ഷോപ്പിംഗ് സൈറ്റുകളിൽ നിന്ന് വാങ്ങുന്നത് പലപ്പോഴും ലാഭകരമാണ്. ബ്രാൻഡഡും, അല്ലാത്തവയുമായ വസ്‌ത്രങ്ങൾ ഓഫറുകൾ ഉള്ളപ്പോഴും, ഇല്ലാത്തപ്പോഴും വിലക്കുറവിൽ കിട്ടാറുണ്ട്. കൃത്യമായ അളവിൽ ഉള്ള വസ്‌ത്രങ്ങൾ ഓൺലൈൻ ഷോപ്പിംഗ് സൈറ്റുകളിൽ നിന്നും എങ്ങനെ കിട്ടും എന്ന ആശയക്കുഴപ്പം എല്ലാവർക്കും ഉണ്ട്. വിവിധ കമ്പനികൾ നിർമ്മിക്കുന്ന വസ്ത്രങ്ങൾക്ക് ഒരേ അളവായിരിക്കില്ല. ഓൺലൈൻ സൈറ്റുകളിൽ കാണിച്ചിരിക്കുന്ന വസ്‌ത്രങ്ങൾ നിങ്ങൾക്ക് ചേരുന്ന അളവ് എങ്ങനെ നോക്കി വാങ്ങാം എന്നത് നമുക്ക് നോക്കാം. ആദ്യമായി തയ്യൽക്കാർ തുണി അളക്കാൻ ഉപയോഗിക്കുന്ന ഒരു ടേപ്പ് വാങ്ങുക. തയ്യൽ സാധനങ്ങൾ വാങ്ങുന്ന കടകളിൽ തുണി അളക്കുന്ന ടേപ്പ് വാങ്ങാൻ കിട്ടും.
Cloth measurement tape 
ഓൺലൈൻ ഷോപ്പുകൾ സന്ദർശിച്ചു നിങ്ങൾക്കിഷ്ടപ്പെട്ട വസ്‌ത്രം കണ്ടെത്തുക. ഫ്ലിപ്കാർട്ട് (Flipkart.com), മിന്ത്ര (Myntra.com), തുടങ്ങിയ സൈറ്റുകൾ തുണിത്തരങ്ങൾ വിൽക്കുന്നവയാണ്. ഉദാഹരണമായി നിങ്ങൾ ഒരു ഷർട്ട് വാങ്ങണമെന്നു കരുതുക. ഷർട്ട് കണ്ടെത്തിയ ശേഷം അതിനോടൊപ്പം ഉള്ള സൈസ് ചാർട്ട് തുറക്കുക. നിങ്ങൾ നിലവിൽ ഉപയോഗിക്കുന്ന കൃത്യമായ അളവിലുള്ള ഒരു ഷർട്ടു എടുത്തു വിവിധ അളവുകൾ താഴെ പറയുന്ന ചിത്രത്തിൽ കാണുന്ന രീതിയിൽ അളന്നു കുറിച്ച് വെക്കുക. 
നിങ്ങളുടെ നിലവിലുള്ള ഷർട്ടിന്റെ അളവ് ഒരു മാനദണ്ഡമായി ഉപയോഗിക്കാം. ഷോൾഡർ, നെഞ്ച്, ഷർട്ടിന്റെ നീളം എന്നിവയാണ് പ്രധാനം. ഇപ്പോൾ ഉപയോഗിക്കുന്ന ഷർട്ടിന്റെ വിവിധ അളവ് കുറിച്ച ശേഷം വെബ്‌സൈറ്റിൽ പറഞ്ഞിരിക്കുന്ന സൈസ് ചാർട്ട് നോക്കുക.

Size chart 
നിങ്ങളുടെ നിലവിലുള്ള ഷർട്ടിന്റെ അളവും, സൈസ് ചാർട്ടിൽ കാണിച്ചിരിക്കുന്ന അളവും തമ്മിൽ ചേർച്ചയുള്ള സൈസ് നിങ്ങൾക്ക് തിരഞ്ഞെടുക്കാം. ഇങ്ങനെ അളവ് എടുത്തു വാങ്ങുന്ന വസ്‌ത്രങ്ങൾ കൃത്യമായി നിങ്ങൾക്ക് ചേരും.